Foinse.ie

Saor Leis an Irish Independant gach Ceardoin

Dé hAoine 25 Eanáir 2013

RSS

TÁ TÚ ANSEO Tuairimí Scéalta ón Taobh Rua Áilleacht na tíre dúchais, níl a leithéid sa domhan

Áilleacht na tíre dúchais, níl a leithéid sa domhan

Chaith mé cúpla lá i gConamara an tseachtain seo caite. Bhí an t-ádh dearg orainn go raibh an ghrian ag spalpadh, agus nach raibh báisteach ar bith le feiceáil ar feadh na seachtaine.

Ag tiomáint amach trí Uachtar Ard agus sléibhte móra Chonamara os ar gcomhair cheap mé ar feadh soicind nó dhó go raibh mé thall san Eilvéis nó áit eicint.

Ina dhiaidh sin suas píosa agus ar dheis i dtreo na Coille Móire. Ní dóigh liom go bhfuil píosa bóthair chomh hálainn leis an mbóthar seo sa tír. An t-uisce taobh leat agus sléibhte ar an taobh eile.

Ceantar Ghleann Eidhneach, nó an Inagh Valley, a ghlaoitear ar an áit speisialta seo. Teach amháin nó teachín beag eile neadaithe sa sliabh, easpa daoine, easpa tráchta, gan ach carr nó bus b’fhéidir gach 10 nóiméad nó mar sin.

Ag druidim i dtreo na Coille Móire anois agus dúirt mé leis na gasúir taobh thiar go bhfuil caisleán amháin an-iargúlta sa tír seo ina bhfuil an prionsa agus an rí agus an bhanríon ina gcónaí go fóill agus sé sin Mainistir na Coille Móire. Stopamar an carr ag an droichead ar an bpríomhbhóthar agus dá bhfeicfeá an aghaidh orthu agus iad ag breathnú isteach thar an uisce ar an bhfoirgneamh ársa sin.

Is mór an trua nach raibh an ceol agam ó Shrek sa gcarr le dul leis!

Chaith mé cúpla lá i Rinn Mhaoile. Is breá liom an áit, ag breathnú amach ar Oileán Dá Chruinne agus Inis Bó Finne. Tá an t-ádh orm le 10 mbliana anuas an chuid is mó den domhan seo a fheiceáil. Tá cúpla trá an-speisialta feicthe agam ach níl dabht ar bith i mo thuairim go bhfuil Trá Leitir Geis thuas ansin leis na cinn is fearr.

Molaim d'aon duine atá ag léamh an ailt seo cuairt a thabhairt ar an trá seo. An t-uisce glan réidh, an gaineamh glan oscailte, an cúlra sléibhtiúil mórthimpeall air, agus os do comhair na hoileáin éagsúla ar Chósta an Atlantaigh. Cliara, Inis Toirc agus Inis Bó Finne, ina measc. Ní mór dúinn eolas agus aithne níos fearr a chur ar an tír féin na laethanta seo go mór mór ó thaobh turasóireachta de.

Chomh maith leis sin leis an suíomh eacnamaíochta atá inar measc b'fhéidir go mbeadh laethanta saoire níos saoire agus níos taitneamhaí le fáil sa mbaile. Dúirt mé ag an tús go raibh an t-ádh dearg orainn an aimsir cheart a fháil ach fós is fiú an ceantar seo a fheiceáil agus tamall a ghlacadh ann. Dála an scéil ní oibríonn na mobiles rómhaith amuigh an taobh seo tíre... ach cén dochar!!! Níor airigh mise ná mo bhean uainn iad... Dochar ar bith... Meas mór a chairde. Coinnígí lasta í.

Scríobh nóta tráchta


Cód slándála
Athnuaigh

Suirbhé

Tá formhór na n-athruithe a fógraíodh i mBuiséad 2013 i bhfeidhm anois ó thús na bliana. An bhfuil tionchar na n-athruithe le tabhairt faoi deara go láidir go fóill dar libh?




Torthaí

Twitter