Foinse.ie

Saor Leis an Irish Independant gach Ceardoin

Déardaoin 24 Eanáir 2013

RSS

TÁ TÚ ANSEO Tuairimí Scéalta ón Taobh Rua Oíche amháin leis an obair uile a cheiliúradh

Oíche amháin leis an obair uile a cheiliúradh

Chaith mé oíche Dé Sathairn seo caite i mBleá Cliath ag na Irish Film agus Television Awards nó na IFTAs mar a ghlaoitear orthu. Bhí an National Convention Centre cois na Life plódaithe le daoine ó gach taobh den ghnó.

Thosaigh an oíche go maith, bhíomar inár suí ag a 7.30pm nó mar sin, thosaigh an chéad chuid den oíche, cineál cleachtaidh a bhí ann do chlár beo a bhí ag dul amach ag a 9.30pm ar RTÉ 1 níos déanaí.

Bhronn siad seacht nó ocht ngradam b’fhéidir agus ansin bhí cead againn sos eile a thógáil agus deoch a fháil. Bhí orm IFTA a bhronnadh ar an gcartún nó beochan is fearr le cailín óg le gruaig rua as Co. Lú darb ainm Evana Lynch.

Tá i bhfad níos mó aithne uirthi mar Luna Lovegood ón scannán cáiliúil Harry Potter. Tá ceithre IFTA ar an tinteán agam sa mbaile, tá mé an-bhródúil astu.

Iad ar fad buaite le mo chlár taistil ar TG4. Bhí an chéad cheann mar an clár siamsaíochta is fearr buaite againn thuas i mBéal Feirste in 2002, is cuimhin liom an gradam a fháil agus ansin taobh amuigh den rud labhairt le Gay Byrne. Bhí sé ag moladh mo chuid cláracha go hard, ní raibh mise in ann é a chreidiúint, agus ansin d’inis sé dom go raibh madra aige sa mbaile agus Hector an t-ainm a bhí air. Siar in 2002 ní raibh ann ach píosa páipéir, teastas agus é i bhfráma.

An bhliain dár gcionn bhuamar trí IFTA in aon oíche amháin. Bhí ormsa, Rosco fear an cheamara agus Evan an léiritheoir dul ar an ardán trí huaire as a chéile, le trí ócáid dhifriúla.

Ar deireadh chas mé píosa de Sí do Mhamó í don slua, agus is cuimhin liom Bono ag gáire agus é thíos fúm chun tosaigh in aice leis an ardán.

Tá mé bródúil go bhfuil mé ag obair le daoine an-chliste agus éirimiúil agus ealaíonta ins an ngnó seo sa tír seo.

Taitníonn an bunsmaoineamh liom do na IFTAS ach cúpla bliain ó shin measaim go raibh níos mó craice agus caidrimh ins an oíche seo. Bhíodh sé ins an mBurlington, bhíodh sé mar Dhamhsa is Dinnéar mór, an bia i dtosach, gach duine suite ag an mbord agus ansin an searmanas.

Thaitin sé liom mar sin, bhí sé níos pearsanta, bhí níos mo béime ar an mbord, agus ar do chomhoibrithe, anois tá sé athraithe isteach go dtí an ócáid ollmhór seo, le stáitse ollmhór i bhfoirgneamh ollmhór.

Sin é, tá mo dhóthain ráite mar sin, níl a fhios agam an ndéanaimid Show Biz extravaganzas rómhaith sa tír seo ach mar sin féin tá sé go deas go bhfuil oíche againn uair sa mbliain leis an obair a cheiliúradh agus scíth a ligean!

Plódaithe: Crowded

Cleachtaidh: Practice

An-bhródúil: Very proud

Clár siamsaíochta: Entertainment show

Pearsanta: Personal

Scríobh nóta tráchta


Cód slándála
Athnuaigh

Suirbhé

Tá formhór na n-athruithe a fógraíodh i mBuiséad 2013 i bhfeidhm anois ó thús na bliana. An bhfuil tionchar na n-athruithe le tabhairt faoi deara go láidir go fóill dar libh?




Torthaí

Twitter