Foinse.ie

Saor Leis an Irish Independant gach Ceardoin

Déardaoin 24 Eanáir 2013

RSS

TÁ TÚ ANSEO Tuairimí Scéalta ón Taobh Rua Tá áthas orm go leanann mo bhuachaillí féin United

Tá áthas orm go leanann mo bhuachaillí féin United

Bhí an dinnéar réidh i mo theach an Domhnach seo caite ag a 2pm. Rósta mór mairteola a bhí ann, go leor prátaí agus neart glasraí. Dinnéar an Domhnaigh is breá liom é agus is breá le mo pháistí é chomh maith.

Ach bhí fáth mór go raibh an dinnéar réidh: an cluiche is mó an séasúr seo sa Phríomhroinn. Manchester United in aghaidh Chelsea. Bhíomar ar bís i mo theach, léinte Utd ar an triúr againn, mé féin agus mo bheirt leaideanna óga.

Bhí an chraobh Eorpach sroichte againn in aghaidh Schalke, bhí sé sin déanta anois. Bhí an fuinneamh agus an aird ar fad dírithe ar Chelsea, foireann mhór shaibhir Londan.

Níl ach íomhá amháin agam agus sé sin Javier "Chicharito" Hernandez thíos ar a ghlúine lámha dírithe ar an spéir agus é ag lorg inspioráide agus cúnaimh ón bhfear thuas staighre. 38 soicind ina dhiaidh sin d’oibrigh sé, agus bhí an chéad chúl scóráilte aige agus an cluiche buaite.

Ón oíche a bhuamar in aghaidh Schalke táim ar thóir ticéadaí don chraobh i Londain in aghaidh Barcelona. Tá sé éasca go leor dul go Londain, bád nó eitleán, ach tá costas dochreidte ag baint leis an óstán agus an ticéad é féin. Ghlaoigh mé ar chara liom, an marcach cáiliúil Johnny Murtagh, ó mo bhaile dúchais, an Uaimh, ag fiosrú faoi thicéadaí.

Dúirt sé liom go nglaofadh sé ar Michael Owen ó Utd! Bhuel má tá an ‘pull’ agat uaireanta tá sé go deas é a úsáid. Má thagann na ticéadaí rachaidh mé ann, craobh Shraith na gCuradh i Wembley le Man Utd agus Barca. Dála an scéil, bhí mé i mo chónaí i dtír na mBascach, an Spáinn, an chéad uair a bhuaigh Barca é, agus cén áit a raibh an chraobh i 1992 ach Wembley?!

Cúl amháin a bhí ann, scóráilte ag an bhfear mór fionn ón Ísiltír Ronald Koeman. Cuireann sé gliondar ar mo chroí an bealach a bhfuil mo bheirt leaideanna ag cur suime i Manchester United.

Nach é a bhí sa tír seo fadó, agus faoi láthair go raibh leaid amháin ag leanúint Liverpool agus leaid eile ag leanúint United? Scoilt agus deighilt sa teach, sin mar a bhíodh sé i mo theach, agus tríocha bliain ina dhiaidh sin tá sé fós ann. Tá Príomhroinn uimhir a 19 buaite againn, agus idir seo agus an 28 Bealtaine beidh mo lámha dírithe ar an spéir ag lorg inspioráide agus cúnaimh ón bhfear mór thuas staighre le haghaidh Shraith na gCuradh.

Scríobh nóta tráchta


Cód slándála
Athnuaigh

Suirbhé

Tá formhór na n-athruithe a fógraíodh i mBuiséad 2013 i bhfeidhm anois ó thús na bliana. An bhfuil tionchar na n-athruithe le tabhairt faoi deara go láidir go fóill dar libh?




Torthaí

Twitter