Foinse.ie

Saor Leis an Irish Independant gach Ceardoin

Déardaoin 24 Eanáir 2013

RSS

TÁ TÚ ANSEO Tuairimí Scéalta ón Taobh Rua Ag snámh ar son na tíre

Ag snámh ar son na tíre

Chaith mé cúpla lá thall sa Spáinn an tseachtain seo caite, bhí an t-ádh linn go raibh an linn snámha díreach in aice lenár seomra leapan mar sin ón gcéad nóiméad a landáil muid chaitheamar an chuid is mó den am san uisce ann. Shroicheamar an áit ag a 9 pm san oíche, te agus tuirseach agus ag cur allais, níor thóg sé ach 30 soicind na héadaí a chaitheamh ar an urlár agus na togs a chur orainn. Ní fhaca mé páistí chomh sásta ariamh le teocht an uisce.

Bhí sé go hálainn ar fad. Bhí fadhb bheag le mo mhac is óige níl sé ach sé bliana d’aois agus faraor níor thóg sé mórán airde insna ceachtanna snámha a bhí ar siúl aige le linn an gheimhridh. Chuireamar iachalll orthu tríd an ngeimhreadh dul ag ranganna snámha. Bhí a dheartháir ann chomh maith agus ní raibh fadhb ar bith leis agus é ag taispeáint an méid a bhí foghlamtha aige dúinn ar fad. Bhí a fhios agam go raibh cineál díomá ar an leaid eile. Théis dhá lá, agus dhá oíche sa linn ní raibh aon fheabhas ar an leaid is óige, bhí a fhios againn nach raibh sé ag baint an oiread céanna taitneamh is a bhí a dheartháir mór. Ach maidin Déardaoin seo caite tharla an mhíorúilt.

Bhí sé ag seasamh ar thaobh na linne agus go tobann gan ceist ná brú léim sé isteach sa linn agus síos leis faoin uisce. Bhreathnaigh mise ar mo bhean chéile, bhí sé deacair é a chreidiúint. Amach leis aríst agus splais mór aríst agus síos faoin uisce. Bhí a fhios aige anois go raibh an linn ar fad ag breathnú air, bhí an léimt ag éirí níos airde agus é ag fanacht faoin uisce níos faide. Bravado na Mí is dócha! Bhíomar iontach bródúil, bhí áthas an domhain orainn go raibh an méid sin déanta aige. Ní raibh sé críochnaithe ansin, leis na goggles air thosaigh sé ag brú san uisce, thosaigh na lámha ag imeacht agus na cosa ag brú. Bhí sé ar nós an Duracell Bunny san uisce ag iarraidh bogadh.

Choinnigh sé leis, ag léimt isteach agus ag iarraidh snámh. “Coinnigh do chloigeann síos faoin uisce!” a dúirt mé leis. “Síos faoin uisce agus ar aghaidh leat.” Théis leathlá ag cleachtadh agus an domhan ag breathnú air bhí sé aige, bhí sé in ann snámh cúpla méadar. Éacht a bhí ann, éacht san uisce! Thóg sé beagáinín níos mó ama orm an snámh a fhoghlaim, bhrúigh leaid mór mé isteach san uisce i linn snámha na hUaimhe blianta ó shin, ní raibh mé ach seacht mbliana d’aois, in san taobh domhain chomh maith.

Ach ag aois 28 i Leisureland na Gaillimhe i mBóthar na Trá d’fhoghlaim mé conas snámh a dhéanamh. Is breá liom é, is breá liom an t-uisce, agus anois tá beirt Michael Phelps beag agam sa chlann. Meas tú céard faoi na Cluichí Oilimpeacha 2028! Ag snámh d'Éirinn!


Scríobh nóta tráchta


Cód slándála
Athnuaigh

Suirbhé

Tá formhór na n-athruithe a fógraíodh i mBuiséad 2013 i bhfeidhm anois ó thús na bliana. An bhfuil tionchar na n-athruithe le tabhairt faoi deara go láidir go fóill dar libh?




Torthaí

Twitter