RSS

TÁ TÚ ANSEO Tuairimí Scéalta ón Taobh Rua Bailiúchán des na treibheanna

Scéalta ón Taobh Rua \| Hector Ó hEochagáin

Bailiúchán des na treibheanna

Bhí an t-ádh orm agus ar mo ghasúr is sine go rabhamar in ann dul go Páirc an Chrócaigh le haghaidh Chluiche Ceannais Iomána na hÉireann le Gaillimh in aghaidh Chill  Chainnigh. Bhí mé ag obair ann, d’iarr Feachtas an Bhailiúcháin nó ‘The Gathering’ orm cúpla mír a dhéanamh dóibh os comhair an tslua ar an lá.
Bhí Kathryn Thomas liom, tá seanaithne agam uirthi agus tá sé go deas a fheiceáil go bhfuil ag éirí thar cionn léi ar an scáileán le cúpla bliain anuas.
Bhí Páirc an Chrócaigh ag iarraidh rud éicint nua agus úr a dhéanamh leis an gceamara don slua ar an lá, bhíodar ag smaoineamh ar dhul suas ar an díon, go dtí an Skyline leis an láithreoir agus an ceamara den chéad uair riamh.
Tá cathair agus contae Bhaile Átha Cliath le feiceáil ann, an Spire i Sráid Uí Chonaill, an Aviva trasna na habhann agus Sléibhte Chill Mhantáin i bhfad uait.
Ar aon nós, ag a 2.12 pm ar an Domhnach an 9ú lá de Mheán Fómhair, chuaigh mé féin agus fear an cheamara agus duine des na hinnealtóirí dín ó Pháirc an Chrócaigh suas go Barr na Staide.
Tógann sé 20 nóiméad nó mar sin dul ann, bhí sceitimíní orm ag breathnú anuas ar na daoine ar fad, ar Chnoc 16, ar an bpáirc agus í ag breathnú go hálainn.
Bhí níos mó ná 82,000 ann agus bhí mise os a gcionn ar fad i gceann des na staideanna is mó agus is fearr san Eoraip.
Ag a 2.33 pm díreach labhair an stiúrthóir liom i mo chluais agus Boom bhí mé beo ar na scáileáin timpeall na Páirce.
“A dhaoine uaisle agus a chairde go léir, táim thuas anseo ar Dhíon Bhaile Átha Cliath, ar an Skyline i bPáirc an Chrócaigh, seo an ócáid spóirt is mó san Eoraip an tseachtain seo. Is bailiúchán é seo des na treibheanna éagsúla atá sa tír, 82,500 agaibh ar fad ar thráthnóna breá grianmhar i lár mhí Mheán Fómhair, mar sin déanaigí cinnte go bhfuil na
Cuirí sa bpost, inis dóibh faoin teacht le chéile mór a bheidh againn an bhliain seo chugainn agus feicfidh mé sibh ar fad in 2013 ag an Gathering!” Ansin d’fhág mé leis na focail Cill Chainnigh Abú agus scread mé ar an maidhc “Come on Galway!” Bhí mé beagáinín claonta leis an scread ag an deireadh i bhfabhar lucht na dTreibheanna ach cén dochar!
Nach as Gaillimh mo mháthair agus mise i mo chónaí ann le fada an lá! Gaillimh Abú ar an 30ú lá!

Scríobh nóta tráchta


Cód slándála
Athnuaigh

Parse Error: Specification mandate value for attribute data-aria-label-part
12:01PM Oct 01