RSS

TÁ TÚ ANSEO Tuairimí Scéalta ón Taobh Rua Bíonn 'liosta le déanamh' i gcónaí

Scéalta ón Taobh Rua \| Hector Ó hEochagáin

Bíonn 'liosta le déanamh' i gcónaí

Tá mé seacht mbliana ins an teach faoi láthair. Bhog mé thart ar 10 míle taobh amuigh de Ghaillimh go dtí an “tuath”. Táimid breá sásta anseo, tá sé ciúin agus tá an teach déanta agus críochnaithe. Bhuel cheap mise go raibh sé críochnaithe ach bhí cúpla rud beag le déanamh go fóill dar leis an mbean chéile, nó an “taobh eile", nó an “boss" mar a déarfá. Ní fhaca mé an stuif a bhí in easnamh, is fear mé ag deireadh an lae. Bíonn an tine lasta, bíonn an ola amuigh sa tank, bhí an dinnéar ar an mbord agus bhí Sky Sports 1 ar an scáileán. Anois sin neamh dúinn, sin Utopia d’aon fhear amuigh ansin. Níl uainn ach faoiseamh agus oíche ar an tolg ag breathnú ar an Champions League nó Corn Heineken.

Bhí cúpla jab beag le déanamh sa teach agus bhíodar fágtha ar an “liosta le déanamh” agus an tseachtain seo théis 7 mbliana sa teach chroch mé an crochadóir le haghaidh an pháipéir leithris agus an crochadóir le haghaidh an tuáille. Sea ní raibh siad crochta le fada an lá. Mhothaigh mé iontach leis an druilire i mo láimh agus an bosca uirlisí le mo thaobh – is cuimhin liom mo pháistí ag breathnú ar chartún darbh ainm “Handy Manny”, lead óg as Meicsiceo nó áit éicint agus é i gcónaí ag deisiú rudaí sa teach agus dos na comharsana sa mbaile.

Bhuel Handy Hector a bhí ann agus mé chomh bródúil leis an jab a bhí déanta, an nóiméad a tháinig mo bhean chéile isteach sa teach an tráthnóna sin thaispeáin mé an obair di. “Féach, féach tá siad crochta! Nach bhfuil an seomra folctha go hálainn anois,” arsa mise. “Faoi dheireadh thiar thall,” arsa an taobh eile faoi dheireadh! Anois tá a fhios agam go raibh siad in easnamh, tá a fhios agam nach raibh aon chrochadóir don bpáipéar leithris againn, ach bhí mise níos gafa agus tógtha leis an tine, an gual, an ola sa teach. Bhí mé buartha faoin ngairdín agus mé ag iarraidh an féar a bhaint gach seachtain.

Sin mar atá na fir a chailíní, sin an bealach a oibríonn cloigeann do bhuachalla nó d'fhir chéile. D’aon lánúin phósta amuigh ansin tóg an t-alt seo, léigh an t-alt seo, smaoinigh ar an alt seo agus úsáid an t-alt seo.

Cinnte in aon teach nua beidh na mílte rud le déanamh, cinnte ní bheidh an teach réidh ina iomlán ariamh ach tóg sos, tóg go bog é agus beidh sé réidh. Agus ná déanaigí dearmad tá sé i bhfad níos tábhachtaí bleaist mhaith páipéar leithris a bheith agat 'crochadóir nó gan crochadóir'!

Scríobh nóta tráchta


Cód slándála
Athnuaigh

Parse Error: Specification mandate value for attribute data-aria-label-part
01:43PM Sep 30