Tá iománaithe na Gaillimhe tar éis droch-cháil a tharraingt orthu féin mar gheall ar an taispeántas leochaileach, lagbhríoch a chuireadar suas in aghaidh Bhaile Átha Cliath thíos i dTulach Mhór le gairid.
Bhí mé féin ann an tráthnóna sin agus caithfidh mé a admháil go raibh siad go dona – fiú Joe Canning féin chinn sé air go minic an liathróid a chur thar an dtrasnán ó phoic shaora a bhí sách éasca, cé gur phléasc sé eangach Bhaile Átha Cliath tar éis seacht nóiméad le cúl álainn.
Ní maith liom féin a bheith ag caitheamh anuas ar iománaithe na Gaillimhe de bhrí gur iomaí lá spóirt agus pléisiúir a thug agus a thugann siad dhom i gcónaí. Fiú an lá cheana i dTulach Mhór bhí mé dóchasach go dtí na cúpla nóiméad deiridh go dtabharfaidís an lá leo.
Bhí Baile Átha Cliath ró-mhaith dóibh agus caithfear moladh mór a thabhairt do Anthony Daly as Co an Chláir atá tar éis iad a threorú chomh fada seo. Dé Domhnaigh seo chugainn in aghaidh Chill Chainnigh a inseoidh an bhfuil an mianach iontu le Craobh na hÉireann a bhaint amach. Dé Sathairn seo chugainn i bPáirc an Phiarsaigh, i nGaillimh a inseoidh an bhfuil fíor na maitheasa in iománaithe na Gaillimhe nó nach bhfuil, nuair a rachaidh siad chun páirce le hiománaithe an Chláir.
De réir cosúlachta, ceapann Conor Hayes, Noel Lane agus Brendan Lynskey nach bhfuil. Tharraing a raibh le rá acu ar an Satharn ar imir Gaillimh in aghaidh Bhaile Átha Cliath go leor cainte.
I mo thuairim bhí an ceart acu a bheith chomh géar agus a bhí siad. Triúr ar bith a ghnóthaigh ocht mbonn Uile-Éireann eatarthu ba chóir go dtabharfaí cead cainte agus éisteacht dóibh.
Ó nach minic a chuir Brendan Lynskey suas a chrúib le breith ar an liathróid as an aer gan fuacht gan faitíos, cé mhéad uair a shábháil Conor Hayes cúl na Gaillimhe le feabhas agus fíochmhaireacht a chuid imeartha agus cé a dhéanfaidh dearmad ar an gcúl breá sin a scóráil Noel Lane in aghaidh Thiobraid Árann sna nóiméid dheireanacha de Chraobh na hÉireann i 1988.
Tá iománaithe na Gaillimhe áithrid agus aisteach. An lá a mbeidh tú ag súil le mórán uathu is minic gurb é a mhalairt a gheobhaidh tú. An lá nach mbeidh tú ag súil le mórán sin é an lá a dtabharfaidh siad an craiceann agus a luach duit.
Sin é an rúndiamhair a bhaineann leo agus sin é an fáth go leanann muid iad. Nár laga
