RSS

TÁ TÚ ANSEO Tuairimí Smaointe Fánacha Caithfidh Obma fáisceadh ar na maidí gan mhoill

Smaointe Fánacha \| Mícheál Ó Conaola

Caithfidh Obma fáisceadh ar na maidí gan mhoill

Tabharfaidh Meiriceánaigh aghaidh ar na botháin vótála ar an 6 Samhain le Uachtarán a thogha.  Níl mórán ama fágtha, ceithre seachtainí ón lá inné, agus is féidir liom na stáisiúin raidió agus teilifíse a shamhlú ag bascadh a chéile le greim a fháil ar an oiread de na milliún dollar agus is féidir, a chaithfear ar na hiarrthóirí idir seo agus sin.

Mitt Romney ar ndóigh an Poblachtach atá ag tabhairt dúshláin Barack Obama, an tUachtarán atá istigh sa Teach Bán le ceithre bliana.  Bhí an chéad mhór dhíospóireacht eatorra an tseachtain seo caite agus beidh an dara ceann ar siúl san oíche Dé Máirt seo chugainn.  Ba é tuairim na coitiantachta gur ghnóth Mitt Romney an chéad dhíospóireacht.  Ba chosúil é Obama an oíche cheana le fear a bhí ró-chinnte ann féin agus a cheap go gcuirfeadh sé Mitt de dhroim seoil gan mórán dua ach tuigeann sé anois go bhfuil Romney níos fearr ná sin ar aghadh na gceamaraí.  Tuigeann sé freisin nach bhfuil an oiread eatorra sna pobalbhreitheanna agus a bhí go háirithe tar éis díospóireachta na seachtaine seo caite.

Nuair a tháinig Obama i gcúmhacht ceithre bliana ó shin bhí eacnamaíocht Mheiriceá ag cúlú agus bhí jabanna á gcailleadh ar fud na tíre.  Chuir Obama na billiúin dollar isteach san eacnamaíocht sin ó shin, ach fós is go mall atá sé ag teacht chuige féin.  Mar gheall ar sin is go righin réidh atá cúrsaí fostaíochta i gcónaí.  Tá thart ar 8% de dhaonra oibre na tíre as obair i gcónaí agus sin céadchodán  ard i Meiriceá.  Is maith le Meiriceánaigh a bheith ag saothrú an dollar, mar sin é an rud a chleacht an chine gheal thall ansin ar aon bhealach. Féach ar ár muintir féin a chuaigh anonn.  Nach minic go raibh dhá jab acu agus b’fhéidir an tríú ceann ag an deireadh seachtaine ag baint plásóga féir agus ag tabhairt aire do ghairdíní.

Gheall Obama an tsíorraíocht sula ndeacha sé isteach sa Teach Bán ceithre bliana ó shin.  Ach ní i bhfad a bhí sé ina shuí sa gcathaoir bhog nuair a thuig sé go dtógfadh sé blianta fada an cúlú eacnamaíochta ar fud an domhain a chur ina cheart.  Ach de bhrí gur gheall sé cat agus dhá iorball,  cuirfidh daonra  dífhostaíochta  Mheiriceá an mhilleán air nuair nach raibh sé in ann an obair sin a chruthú.  Ní amháin sin ach tá baol ann go gceanglóidh  siad cliseadh an Uachtaráin jobanna a chur ar fáil le leisciúlacht an chine ghorm (ina dtuairim) agus a nós maireachtála siúd atá go síorraí i dtuilleamaí cúnamh ón stát. Nár dhúirt Romney féin go raibh 47% den phobal vótála ag brath ar an stát agus tá fhios againn cé a bhí i gceist aige.  Tharraing sé siar an chaint sin ina dhiaidh sin ach bhí an damáiste déanta.  Ní mór do Obama fáisceadh ar na maidí sa gcéad dhíospóireacht eile agus léas dóchais a thabhairt do lucht na dífhostaíochta má tá sé le fanacht sa Teach Bán ar feadh ceithre bliana eile.

Scríobh nóta tráchta


Cód slándála
Athnuaigh

Parse Error: Specification mandate value for attribute data-aria-label-part
02:53PM Nov 26