RSS

TÁ TÚ ANSEO Tuairimí Smaointe Fánacha Oireachtas na Samhna i dTír Chonaill

Smaointe Fánacha \| Mícheál Ó Conaola

Oireachtas na Samhna i dTír Chonaill

Tá an dá chorn mhóra thuas i dTír Chonaill anois. Corn ‘Sam’ agus corn Neidí Frainc Mhic Grianna.  Is maith an oidhe orthu é.  Thug mé ruaig ó thuaidh go Leitir Ceanainn an deireadh seachtaine seo caite le freastal ar Fhéile an Oireachtais agus  ghlac mé páirt sa gcomórtas scéalaíochta.  Bhí comórtas maith ann agus sílim go bhfuil sé ag neartú leis in aghaidh na bliana.  Cé gur thosaigh sé le héirí soilseach ag 9.30 ar maidin Dé Sathairn,  bhí  drong deas daoine i láthair agus bís éisteachta ar gach duine.  Gearóidín Breathnach as Croithlí a ghnóthaigh an chéad duais de €500, bonn airgid agus Corn Neidí Frainc agus ba í Máirín Mhic Lochlainn as Indreabhán a fuair an dara háit, bonn cré-umha agus €300.

Ar ndóigh sí Gearóidín iníon Neidí Frainc agus ní hiontas ar bith bua na scéalaíochta a bheith aici.  Eagraíonn Gearóidín ranganna scéalaíochta do pháistí scoile thuas i nGaeltacht Thír Chonaill ar ala na huaire agus déanann Máirín Mhic Lochlainn riar den chineál seo oibre freisin i gCois Fharraige.

Bhí mé ag taisteal nuair a bhí an comórtas mór sean-nóis ar siúl. Bhí Corn Cuimhneacháin Sheáin Uí Riada, bonn óir agus €1500 ag dul don chéad áit, bonn airgid agus €600 don dara háit agus bonn cré-umha agus €400 mar dhuais don tríú háit.  Ba é Pól Ó Ceannabháin as an Aird Thoir, Carna, a ghnóthaigh an duais mhór. Fonnadóir breá é Pól a fuair a chuid amhrán óna athair Michael Mháire Ghabha  agus tá stíl bhreá sean-nóis Charna aige. Máire NÍ Cheilleachair as Corcaigh a fuair an dara háit agus Caitlín Ní Chualáin as Indreabhán a fuair an tríú háit.

Caithfidh mé a rá gur bhain mé an-taitneamh as an gcomórtas agus mé ag éisteacht leis faoi bhealach. Seisear a fuair glaoch ar ais agus chasadar amhrán mear an dara geábh. Chuala mé a mbunáite cheana ach bhí amhrán amháin nach raibh cloiste agam. Máirín Uí Chéide a chas é agus ba mhaith uaithi. Tagann Máirín anall as Bostún Mheiriceá gach bliain i gcomhair an chomórtais seo agus tá an-chreidiúint ag dul di as ucht taisteal chomh fada sin ó bhaile. Ar ndoigh is as an Máimín, Leitir Móir ó thús í ach tá sí ina cónaí i mBostún le fada.  Thug sí Corn Ui Riada léi i 1986 agus ar bhealach tá iontas orm nach bhfuil sé tugtha léi níos minice aici mar is deacair a sárú mar fhonnadóir a fháil.

Bhí fonnadóir eile a chuaigh i bhfeidhm orm agus mé ag taisteal ó dheas in aghaidh na doininne san oíche Dé Sathairn. Sin í Eibhlís Uí Thuama as Béal Átha an Ghaorthaidh. Ní bhfuair Eibhlís aon ghlaoch ar ais ach cheap mé féin go raibh sí thar barr.

Agus ar deireadh ní fhéadfainn dearmad a dhéanamh ar Mháire Mhic Niallais a fuair gradam speisialta ó RTÉ Raidió na Gaeltachta as a cuid oibre do shaíocht agus do chultúr na Gaeilge. Go maire sí a nuaíocht.

Scríobh nóta tráchta


Cód slándála
Athnuaigh

Foinse Ceathrar fós faoi choimeád maidir le dúnmharú fir i nGaillimh - http://is.gd/RnjMG3 - An nuacht is déanaí ó Foinse.ie #gaeilge
09:30AM Jun 07
Foinse Pianbhreith le gearradh ar iarshagart as dhá chúis de mhí-úsáid ghn - http://is.gd/GG4KIs - An nuacht is déanaí ó Foinse.ie #gaeilge
09:15AM Jun 07
Foinse An Stát chun achomharc a dhéanamh maidir le rialú a thug an Ard-Chúi - http://is.gd/6uUlU6 - An nuacht is déanaí ó Foinse.ie #gaeilge
02:46PM Jun 06
Foinse Deis cógais níos saoire a chur ar fáil d'othair - http://is.gd/duhG26 - An nuacht is déanaí ó Foinse.ie #gaeilge
11:53AM Jun 06
Foinse Teachtaireacht ó cheannaire Al-Qaeda do mhuintir na Siria - http://is.gd/B1udmP - An nuacht is déanaí ó Foinse.ie #gaeilge
09:48AM Jun 06