RSS

TÁ TÚ ANSEO Tuairimí Smaointe Fánacha Josie Sheáin Jeaic: Is cinnte nach ón ngaoth a thug sé é

Smaointe Fánacha \| Mícheál Ó Conaola

Josie Sheáin Jeaic: Is cinnte nach ón ngaoth a thug sé é

Mar a deireadh an sean dream fadó, ‘ní ón ngaoth ná ón ngrian a thug sé é’.  Go deimhin bhí an saibhreas fonnadóireachta, ceoil, seanchais agus scéalaíochta mórthimpeall  air ar fud Iorras Aithnigh agus é ag éirí aníos.  Ní raibh i bhfad le dhul aige ach an oiread.  Ar leic an teallaigh bhí a athair Seán Jeaic Mac Donncha, fonnadóir breá a raibh stór mór amhrán aige agus ar tugadh craobh an Oireachtais dó  i 1943.

Josie Sheáin Jeaic Mac Donncha  ón Aird Thiar, Carna atá faoi chaibidil agam, fear ar bronnadh Céim Mháistreachta Oinigh air le gairid in Ollscoil na hÉireann, Gaillimh.  Ba mhaith an oidhe air é. Dé hAoine seo chugainn in Óstán Chuan Charna, ag a 9.00, beidh oíche mhór cheoil agus amhránaíochta á heagrú ag Coiste Eagrúcháin Fhéile Chomórtha Joe Éinniú in onóir do Josie, fear a ghnóthaigh príomhdhuais an Oireachtais i 1971 nuair a thug sé leis Corn Chomhlacht an Oideachais, agus arís i 1978 agus 1982 nuair a bronnadh Corn Uí Riada air.

Thosaigh Josie Sheáin Jeaic ag gabháil fhoinn go poiblí agus é ina dhéagóir ag Feis Charna agus bhí sé ag casadh ag an Oireachtas agus é sna fichidí. Chomh maith lena athair féin bhí scoth na bhfonnadóirí mórthimpeall ar leic an dorais aige le comhairle a chur air – leithéidí Seán ‘Ac Dhonncha, Dara Bán Mac Donncha,  Michael Mháire Ghabha Ó Ceannabháin agus ar ndóigh an máistir mór é féin Seosamh Ó hÉanaí.  Maireann an chraobh ar an bhfál ach ní mhaireann an lámh do chuir.

Shiúl Josie áiteacha go leor agus é i mbun a chuid fonnadóireachta.  Thaisteal sé le Comhaltas Ceoltóirí Éireann go Sasana agus go hAlbain mar chuid de Chuairt na bhFilí agus  chuaigh sé chomh fada ó bhaile le Libia ag gabháil fhoinn i 1976, arís le Comhaltas.  Bhí baint aige le bunú Cumann Amhránaíochta Iorras Aithneach – seisiún amhránaíochta agus ceoil a reáchtáiltear i gCarna ar an Satharn deireanach de gach mí.

Tá dhá mhór thaifead déanta aige:  Josie Sheáin Jeaic (Cinq Planets, 2000) agus Ó na Sceirdí Aniar (Gael Linn, 1987).  Bhí páirt aige sa scannán The Irishman – An Impression of Exile, a rinneadh sna seachtóidí agus sa tsraith Atlantean a rinne Bob Quinn sna hochtóidí agus bhí sé ina amhránaí cónaithe in Ollscoil na hÉireann, Gaillimh ó 2003 – 2004.  Ar ndóigh is iascaire freisin é agus tá sár eolas aige ar oileáin agus ar charraigreacha an cheantair agus ar an seanchas agus na scéalta a bhaineann leo.

Marcus Ó hIarnáin agus a chlann ceolmhar as Roisín na Mainíoch, Carna a chuirfidh an tsiamsaíocht ar fáil don oíche agus beidh neart damhsa freisin ann ó bheirt de chlannmhac Mharcuis,  seaimpíní an Oireachtais, Breandán agus Proinsias.  Beidh saor chead isteach agus sólaistí ar fáil.  Tá cuireadh oscailte faighte ag amhránaithe ar fud na tíre a bhfuil suim acu sa sean-nós chun na hócáide seo, a thabharfaidh aitheantas don fhear seo atá ar dhuine de phríomhamhránaithe sean-nóis na tíre agus a bhfuil tuiscint dhomhain aige ar  ealaín an tsean-nóis  agus gach a mbaineann léi.

Scríobh nóta tráchta


Cód slándála
Athnuaigh

Parse Error: Specification mandate value for attribute data-aria-label-part
09:32AM Oct 22