RSS

TÁ TÚ ANSEO Tuairimí Smaointe Fánacha Comóradh Éirí amach na Cásca sa bhliain 2016

Smaointe Fánacha \| Mícheál Ó Conaola

Comóradh Éirí amach na Cásca sa bhliain 2016

Dá bhroidiúlaí an Rialtas ag tús na bliana nua ní fada go gcaithfidh siad aghaidh a thabhairt ar chomóradh céid Éirí Amach na Cásca in 2016. Is cinnte go mbeidh moltaí ag teacht chun cinn maidir leis na bealaigh ar cheart an ócáid a chomóradh agus a cheiliúradh. Bheadh moladh amháin agam féin, an spíce fada sin i lár Shráid Uí Chonaill a chaitheamh anuas agus píosa ealaíne a chur ina áit. Uair ar bith a dtéim thairis fiafraím dhíom  féin cén fáth agus cén chaoi ar cuireadh suas a leithéid de spliota, scléipeach, seafóideach.

 

Ar an gcéad dul síos níl sé ag réiteach dubh ná bán i mo thuairim leis na foirgnimh eile i Sráid Uí Chonaill, le Ard-Oifig an Phoist, ná le dreach ginearálta na bhfoirgneamh eile ar an tsráid bhreá seo. Níl sé ag réiteach ach an oiread leis na dealbha atá ar an tsráid le fada. I bhfocail eile níl sé ag réiteach le stair, le dreach cathrach ná le hatmaisféar Phríomhchathair na hÉireann.

 

Ar ndóigh cuireadh suas é in aimsir an Tíogair Cheiltigh nuair a bhí airgead fairsing agus é á chaitheamh go fánach. €4 mhilliún a chosain an spíce le cur le chéile agus le cur suas agus bíonn costais bhreise gach bliain á choinneáil glan agus á choinneáil lasta. De réir cosúlachta,imíonn na bolgáin atá thuas uachtarach air sách minic agus ansin ní mór craein nó crann tógála speisialta a thabhairt isteach i Sráid Uí Chonaill leis na bolgáin sin a athrú.

 

Airgead á chaitheamh go fánach arís agus gan é le spáráil anois faraor. Ar ndóigh ní shásódh spíce beag muid ag an am. Chaithfí ceann a chur suas a bheadh ní b’airde ná aon spíce eile ar domhan.

 

Ba chuma ach feictear dhom má bhí fíbín ar dhaoine spíce a chur suas, go mbreathnódh spíce beag thart ar chéad troigh ar airde i bhfad ní b’fhearr agus ní bheadh na costais chothbhála leath chomh

trom.

 

Ba chomhlacht Sasanach, Ian Ritchie Architects, a rinne an dearadh ar an spíce agus tá sé 398 troigh ar airde. Thosaigh ancomhlacht tógála SIAC á chur suas i Mí na Nollag 2002 agus bhí sé thuas ar an 21Eanáir, 2003.Ba é Joe Doyle a bhí ina Ard-Mhéara ar Bhaile Átha Cliath nuair a roghnaíodh an spíce as na céadta iontrálacha agus ba é Bertie Ahern a bhí ina Thaoiseach. Anois agus an tír bánaithe is truamhéalach an éadáil an spíce seo a bheith ag seasamh i lár Shráid Uí Chonaill mar chomhartha dóchais i lár an éadóchais.

 

Molaim é a bhaint anuas agus píosa ealaíne a chur suas ina áit a bheadh ionadaíoch ar an tír ar fad, ar na tríocha dó contae agus a léireodh mian na bhfear agus na mban a throid i 1916 agus ag an am céanna a léireodh mian na ndaoine a shínigh Comhaontú Aoine an Chéasta i 1998, go mairfeadh gach aicme polaitiúil agus creidimh ar an oileán seo le chéile faoi bhrat sona na síochána.

Scríobh nóta tráchta


Cód slándála
Athnuaigh

Foinse Ceathrar fós faoi choimeád maidir le dúnmharú fir i nGaillimh - http://is.gd/RnjMG3 - An nuacht is déanaí ó Foinse.ie #gaeilge
09:30AM Jun 07
Foinse Pianbhreith le gearradh ar iarshagart as dhá chúis de mhí-úsáid ghn - http://is.gd/GG4KIs - An nuacht is déanaí ó Foinse.ie #gaeilge
09:15AM Jun 07
Foinse An Stát chun achomharc a dhéanamh maidir le rialú a thug an Ard-Chúi - http://is.gd/6uUlU6 - An nuacht is déanaí ó Foinse.ie #gaeilge
02:46PM Jun 06
Foinse Deis cógais níos saoire a chur ar fáil d'othair - http://is.gd/duhG26 - An nuacht is déanaí ó Foinse.ie #gaeilge
11:53AM Jun 06
Foinse Teachtaireacht ó cheannaire Al-Qaeda do mhuintir na Siria - http://is.gd/B1udmP - An nuacht is déanaí ó Foinse.ie #gaeilge
09:48AM Jun 06