RSS

TÁ TÚ ANSEO Gnéithe Faisean

Bean Feasa an Fhaisin

Smaragaid

Fáilte romhaibh a chairde chuig an gcéad eagrán d’Fhoinse 2013 agus chuig an gcéad leathanach faisin. Tá rud éigin álainn agus spreagúil faoi bhliain nua. Is cúis iontach é le tosú arís agus triail a bhaint as rudaí nua agus céard atá níos fearr ná triail a bhaint as stíl nua na bliana? Ceann de na rudaí is deise faoi fhaisean ná go bíonn sé ag síorathrú.

Bliain nua – faisean nua! Ach céard go díreach a bheidh á chaitheamh againn go léir in 2013? Bhuel, de réir a raibh le feiceáil ar na hardáin taispeána, tá neart le bheith ag súil leis. Ach cé go díreach a deir linn cad a bheidh istigh? Le déanaí, tháinig mé ar chomhlacht a oibríonn le dathanna i gcomhair na hearnála faisin, dearaidh agus áilleachta.

Tá an comhlacht seo, darb ainm Pantone, ag tuar gurb é an dath smaragaide a bheidh istigh ar bhealach mór in 2013. Go deimhin is rogha éagsúil é smaragaid mar dhath mór na bliana. De ghnáth ní bhíonn glas chomh feiceálach sin ar na hardáin ach bhí sé le feiceáil ag Michael Kors agus chaith Kate Middleton gúna álainn smaragaide ar chuairt oifigiúil le déanaí.

Is cosúil gur maith leis an mBandiúc an dath seo mar chaith sí an gúna álainn lása ag ócáid mhór i Londain níos luaithe i mbliana ag céilúradh na gCluichí Oilimpeacha 2012. Taitníonn an dath seo go mór liom mar gheall ar an saibhreas atá i gceist leis. Oirfidh na dathanna sa réimse seo do dhathúchán mhná na hÉireann go mór freisin.

Seo roinnt de na píosaí atá feicthe agam le déanaí agus cinnte beidh i bhfad níos mó smaragaide le teacht sa bhliain atá romhainn.

1Tá na jíons tanaí seo ar €13 ó PENNEYS ar fheabhas mar thús do phlé le smaragaid.

2Tagann an blús aoibhinn seo ó bhailiúchán na Kardashians ag DOROTHY PERKINS atá laghdaithe anois go €26.

3 Má tá an t-ádh leat teacht ar aon phíosa ó bhailiúchán na Kardashians ag DOROTHY PERKINS tá an gúna seo go hálainn uathu. Tá sé laghdaithe go €29 anois.

4 Mura bhfuil suim agat i bpíosa mór a chaitheamh sa dath seo, is féidir an mála álainn seo a fháil ó iCLOTHING.IE ar €60.

Caith do shúil air seo

na malaí caola imithe agus ó Megan Fox go Natalie Portman, is léir gurb é treocht an lae inniu malaí níos tibhe a bhfuil cruth maith agus cuma bhreá nádúrtha orthu. Níl dabht ar bith faoi ach go gcuireann malaí maithe go mór le do chuma, is féidir leo d’aghaidh a athrú agus a fheabhsú. Mar sin, is fiú go mór an aire agus an aird cheart a thabhairt dóibh!

Is coincheap nua é HD Brows (High Definition Brows) a chabhraíonn leat an cruth malaí is fearr duit féin a bhaint amach. Tá an-éileamh ar an gcóireáil áilleachta seo sa Ríocht Aontaithe, go háirithe i measc daoine cáiliúla agus níl sé ar fáil ach i gcúpla sciamhlann in Éirinn.

Ba smaoineamh de chuid Nilam Patel, sciamheolaí aitheanta i Sasana, é HD Brows. Thug sí faoi deara go raibh an-éileamh ar an gcóireáil mala a chuir sí ar fáil agus chinn sí an comhlacht HD Brows a bhunú dá bharr le freastal ar an éileamh sin.

Is é seo an chóireáil mala a fuair an t-amhránaí Cher Lloyd nuair a bhí sí ag glacadh páirte san X Factor.  Thosaigh Cher sa chomórtas le malaí caola ach tháinig claochlú orthu roimh dheireadh na sraithe!

“Thugamar ár gcóireáil speisialta mala do Cher,” arsa Nilam. “De bharr chruth a malaí mar a bhí, bhí cuma fheargach agus i bhfad níos sine uirthi. Theastaigh uainn cuma níos boige a thabhairt do Cher agus fráma ceart a chur ar a haghaidh.”

Tá HD Brows triailte ag réaltaí ar nós an láithreora teilifíse agus an t-amhránaí Jenny Frost, an t-aisteoir Shobna Gulati, an mainicín Bianca Gascoigne agus an láithreoir teilifíse Konnie Huq. Tá ardmholadh tugtha acu go poiblí don chóireáil.
Tá HD Brows oiriúnach do dhaoine idir óg agus aosta, idir fhir agus mhná. Bhí Simon Webbe agus Duncan Stewart, iarbhaill den bhanna ceoil Blue, an-sásta le torthaí na cóireála!

Má tá tú ag cuardach an chrutha mala atá ceart duitse, tá HD Brows ar fáil anois in Éirinn in Chez Elaine, sciamhlann i gcathair na Gaillimhe.  Dar le Elaine Barrett, úinéir na sciamhlainne, ní gnáthchóireáil mala é seo.

“Is ealaín malaí é an teicníocht seo. Le HD Brows, cuirtear an bhéim ar dhearadh agus ar chruth na malaí,” a dúirt sí.  “Is féidir linn malaí a bhfuil i bhfad an iomarca gruaige bainte díobh a athrú go malaí a bhfuil cruth foirfe orthu.”

Tá dathú gruaige, agus baint gruaige le céir, trí shnáithiú agus le pionsúirín ar chuid de na seacht gcéim a bhaineann le cóireáil HD Brows.

Chun an cruth is fearr a bhaint amach, is gá cúpla cóireáil de chuid HD Brows a fháil. Bhí an méid seo le rá ag Jenny Frost, iarbhall den bhanna ceoil Atomic Kitten, faoi HD Brows: “Ba cheart do gach duine dul amach agus teicneoir HD Brows a aimsiú dóibh féin. Cuireann na malaí fráma ar d’aghaidh agus déanann sé an-difríocht cruth maith a bheith orthu.

“Nuair a bhreathnaím siar ar sheanphictiúir díomsa roimh HD brows a bheith agam, bíonn náire orm!”

Faisean- Ag dul chuig Bainis

 

 

Le teacht an tsamhraidh tá séasúr na mbainiseacha tagtha freisin! Is aoibhinn linn go léir dul chuig bainis, is ócáidí an-speisialta go deo iad agus is leithscéal iad freisin chun gléasadh suas.
Ní raibh ach bainis amháin agam an samhradh seo faraor ach tá cairde agam a bhfuil níos mó ná ceithre cinn acu.
Is costasach an gnó iad na bainiseacha do gach aon duine atá páirteach iontu, go háirithe más bean thú! Seachas a bheith buartha faoi chulaith ba mhaith liomsa cabhrú libh bhur rogha a dhéanamh níos éasca.


Má tá an t-ádh leat a bheith ag freastal ar níos mó ná bainis amháin ná bíodh imní ort. Tá an-seans ann gur féidir an chulaith chéanna a chaitheamh faoi dhó, braitheann sé ar na haíonna a bheidh i láthair, uaireanta ní hiad na daoine céanna a bhíonn ag na bainiseacha difriúla. Más mian leat an chulaith chéanna a chaitheamh ní gá ach a bheith cruthaitheach faoi. D’fhéadfá athruithe beaga a dhéanamh an dara huair cosúil le bróga difriúla, oiriúintí difriúla nó cóirséad a chur ort féin.


De ghnáth sa tír seo, seachas ócáidí carbhait dhuibh, ní chuireann mórán daoine cód gléasta ar a gcuid aíonna.
Ach ag an am céanna tá sé tábhachtach smaoineamh ar an saghas ócáide atá ann. An ócáid an-fhoirmiúil atá i gceist nó an bhfuil an lánúin nuaphósta níos réchúisí ná sin b’fhéidir? Tá rogha leathan gúnaí ann atá feiliúnach i gcomhair bainiseacha ach ná lig dó sin cur as duit agus tú ag siopadóireacht. An rud is tábhachtaí agus tú ag roghnú i gcomhair bainise, ná go mbeadh sé compordach.


Bíonn lá na bainise an-fhada, bíonn a lán ithe, óil agus damhsa i gceist agus is fearr a bheith ar do chompord.
Mholfainn gan gúna nach bhfuil strapaí air a cheannach más duine thú a bhíonn de shíor á tharraingt aníos ort féin mar shampla! Tá roinnt gúnaí difriúla roghnaithe agam daoibh anseo.

1 Tagann an gúna dúghorm seo ó Reiss ar €185, is aoibhinn liom an lása mín atá air agus gan dabht bheadh na muinchillí fada go hiontach d'aon duine atá buartha faoi na géaga.

2 Tá an gúna sa dath céanna seo ó Miss Selfridge níos saoire, arís bheadh an gúna seo an-chompordach i gcomhair lá fada agus tá an fad ‘midi’ atá air istigh go mór faoi láthair, praghas an-réasúnta ar €65.

3 Taitníonn an cruth ar an ngúna seo go mór liom, bheadh an choim atá air an-mhealltach ar aon duine, freisin is álainn an pátrún bláthach atá air. Is féidir é a cheannach in Dorothy Perkins ar €60.

4 Is iontach an rogha é seo freisin ó Awear, tá an pátrún bláthach an-shamhrata go deo agus is cruth éasca é seo le caitheamh freisin, an-mhargadh ar €50.

5 Ar deireadh céard faoin ngúna rúitín seo ó Penneys, d’fhéadfá péire bróga nua a cheannach chomh maith mar níl ar an ngúna seo ach €17.

Éadaí Bláthacha don Samhradh

Ní dóigh liom go bhfuil mórán treochtaí eile ann atá chomh banúil is atá éadaí bláthacha. Chomh luath is a thagann lusanna an chromchinn amach san earrach d’fhéadfá a rá go dtugtar cead dúinn dathanna geala agus pátrúin bhláthacha a chaitheamh!

Go deimhin rinne mé plé ar an treocht seo an tráth seo anuraidh, ach tá na bláthanna fillte arís i mbliana ar bhealach mór. An t-earrach agus an samhradh seo caite bhí an-bhéim ar dhathanna éadroma pastail agus bhí a lán pátrúin bhláthacha bunaithe ar na dathanna sin. I mbliana áfach tá pléascadh mór feicthe againn ó thaobh dathanna láidre geala de agus cinnte tá na bláthanna geal chomh maith céanna.

Ar ndóigh tá roinnt bealaí difriúla leis an treocht seo a chaitheamh. Is féidir gach rud ó scaifeanna go brístí a fháil i bpátrún bláthach. Is féidir blas den treocht seo a chruthú agus a bheith níos caolchúisí leis trí, mar shampla, ghúna deas simplí a chaitheamh. Nó is féidir dul thar fóir leis agus spraoi a bheith agat leis. I mbliana tá béim mhór ar phátrúin láidre bhláthacha a mheascadh le chéile. Ní fhacamar an treocht seo go dtí seo agus cinnte tógann sé roinnt crógachta lena chaitheamh mar gan dabht is stíl éagsúil é seo. Oibríonn an meascán seo go pointe áirithe ach is gá a bheith cúramach leis ag an am céanna.

Sampla maith den mheascán seo ag obair go maith ná an bríste gearr agus an bharréide atá á gcaitheamh ag an mainicín ó Monsoon anseo. Ní smaoineofá riamh roimhe seo ar na pátrúin seo a mheascadh mar ní chreidfeá go n-oibreodh sé ach feiceann sibh anseo go n-oibríonn.

1 An fáth go n-oibríonn an chulaith seo ó Monsoon ná go bpiocann an bríste gearr an gorm atá sa bharréide freisin agus tógann sé sin ar fad le chéile é. Beidh an bríste gearr seo ag teacht amach an mhí seo chugainn ar €59 agus is féidir an bharréide a fháil faoi láthair ar €64.

2 Seo rogha eile ar an treocht chéanna ó Monsoon arís. Oibríonn an gúna seo de lá nó d’oíche. Tá an rogha seo beagáinín costasach ach is píosa álainn é ar €186.

3 Ag fanacht le Monsoon atá mé leis an gculaith léime bhláthach seo. Labhair mé libh mar gheall ar chultacha spraoi agus léime agus an tóir mhór atá orthu arís i mbliana. Is maith liom an rogha seo mar tá tú ag fáil dhá threocht ar phraghas cinn amháin leis an gculaith agus an pátrún. €161 atá air seo.

4éadaí áille in Dorothy Perkins an séasúr seo. Déanann siad oiriúintí iontacha chomh maith. Ceapaimse go bhfuil cuma an-chostasach ar an gcóta agus ar an ngúna bláthach seo uathu. Tá cóta bán go hálainn don séasúr seo, €95 atá air agus €59 atá ar an ngúna.

5 Is as New Look an rogha dheireanach an tseachtain seo. Tá stíl na seachtóidí, a bhfuil an-tóir air freisin an séasúr seo, ag teacht isteach leis an ngúna simplí seo. Is maith liom an bealach freisin ar bhain siad úsáid as an gcrios agus na bráisléid chun an chulaith a chur le chéile. €34.99 atá air.

Gléas ar nós Blake Lively

Gach bliain nó dhó tagann réalta éigin chun cinn ó thaobh cúrsaí stíle de. Feicimid pictiúir de na réaltaí seo i ngach irisleabhar agus páipéar nuachta agus clú á fháil acu mar gheall ar a stíl agus na héadaí a bhíonn á gcaitheamh acu. De ghnáth, is mian linn go léir aithris a dhéanamh ar na daoine seo nuair atáimid ag gléasadh agus ag siopadóireacht.

Na réaltaí faisin atá i gceist agam ná leithéidí Kate Moss, Sienna Miller agus Alexa Chung. Ach na laethanta seo tá bean amháin atá go mór chun cinn agus is í sin an spéirbhean Blake Lively. Is cuimhin liom féin í a fheiceáil den chéad uair sa tsraith rathúil Gossip Girl. Gan dabht tá stíl álainn ag a carachtar Serena Van Der Woodsen sa chlár agus is mian le gach dearthóir í a ghléasadh ar an scáileán.


Le blianta beaga anuas, tá aithne ar Blake í féin mar laoch faisin ach le déanaí tar éis conradh a fháil le Chanel mar mhainicín ar an mála nua Mademoiselle tá sí le feiceáil anois i ngach áit. Gan dabht, tá cuma an mhainicín uirthi, tá sí aclaí le cosa agus gruaig fhada. Is mór an onóir deis mar seo ó Karl Lagerfeld é féin agus tá sé ráite nach raibh sí sásta tabhairt faoi aon fheachtas eile mar bhí brionglóid aici faoi Chanel a fháil le blianta fada.


D’fhéadfá a rá go bhfuil stíl Blake an-chosúil leis an íomhá a bhíonn aici ar Gossip Girl. Meascann sí sraitheanna de phíosaí costasacha le píosaí níos ‘boho’ agus bíonn cuma ghnéasach uirthi i gcónaí. Is minic a bhíonn a cosa fada le feiceáil le dath na gréine orthu agus í ag caitheamh brístí agus sciortaí gearra.

I rith an lae bíonn cuma níos boho uirthi agus nuair a bhíonn sí ar an gcairpéad dearg is minic a bhíonn a gruaig tarraingthe siar le gúna teann i ndath láidir geal uirthi. Caithfidh mé a admháil go bhfuil tionchar aici ar an stíl a thaitníonn liom féin faoi láthair mar gheall ar an tslí a gcuireann sí cultacha le chéile. An tseachtain seo roghnaíos roinnt píosaí i stíl Blake, gan dabht ní gá na mílte Euro a chaitheamh chun aithris a dhéanamh uirthi!


1 Ar dtús roghnaigh mé an hata seo ó Dorothy Perkins, caitheann Serena agus Blake hataí go minic agus is dóigh liom gur ceann deas é ar €30.

2 Tá meascán de stíl ghnéasach agus boho ag Blake. Roghnaigh mé an cairdeagan seo mar is maith léi sraitheanna a chur le chéile agus d’fhéadfá tosú leis seo ar €70 ó Topshop.

3 Is aoibhinn le Blake Topshop agus chonaiceamar pictiúir di le déanaí i Nua-Eabhrac agus í ag iompar ualach mór málaí uathu. Shamhlóinn í sa bharr seo uathu ar €53.

4 Is maith le Blake brístí gearra a chaitheamh chomh maith le sciortaí le bróga fíorarda. Is aoibhinn liom an péire seo ó Dorothy Perkins ar €40.

5 Is minic freisin a fheictear í i seaicéid tuxedo nó blazer agus téann an seaicéad seo leis na
brístí gearra, arís ó Dorothy Perkins, €70.

6 Tagann an gúna bodycon seo ó Topshop, tá sé teann, gearr le dath álainn agus cinnte thaitneodh sé le Blake, €99 atá ar.

7 Ar deireadh tá an gúna dearg seo ó asos.com, tá sé sách gearr agus is aoibhinn liom an muineál atá air, an-mhargadh ar €32.05.

Am le lása a chaitheamh

Ní don óige, do lucht an rachmais, don dream spiagaí amháin an faisean. Scaoileann seachtain faisin agus bailiúcháin rúidbhealaigh rúin faoi na stíleanna atá ag teacht. Mura bhfuil d’fheisteas d’earrach agus do shamhradh 2011 curtha i gcrích go foirfe agat, tá réiteach na faidhbe againne duit — Tigh Standún sa Spidéal, ar chósta álainn Chonamara.
bailiúchán earraigh/samhraidh 2011 le fáil sna siopaí i láthair na huaire.

Níos tábhachtaí fós, bíonn daoine cáiliúla ag caitheamh na bpríomhthreochtaí agus stíleanna, agus sin an fáth ar cheart duit aird a thabhairt ar na pictiúir a fheictear díobh. Bhreathnaíomar ar sheó faisin tithe dearaidh, agus ar phictiúir de dhaoine cáiliúla, agus is léir go gcaithfimid aghaidh a thabhairt ar an lása an séasúr seo.

Beidh éagsúlacht ollmhór lása le feiceáil i ngach áit, agus is treocht é ar féidir le gach duine, beag beann ar chruth nó ar mhéid, a chaitheamh. Tá léinte teanna lása ann a léiríonn go bhfuil tú gnéasach agus léinte scaoilte lása ann a dhéanann gaisce as d’fhaisean. Ní raibh tóir ar mheaitseáil le tamall anuas, mar sin measc an lása le héadach agus le pátrúin dhifriúla. Is féidir le lása agus leathar a bheith an-spleodrach le chéile, agus ní sheachnóinn seo díreach mar gurb é an t-earrach é. Tá neart lása le fáil Tigh Standún a oirfidh do gach sparán.

Mar sin, a mhná, téigí go dtí Tigh Standún agus ceannaígí an lása. Seo cúpla sampla den treocht bhanúil, ghleoite agus shofaisticiúil atá á caitheamh ag daoine mar Olivia Palmero, ar chlé agus Blake Lively, ar dheis. Tigh Standún is féidir leat an treocht seo a phiocadh suas agus tá samplaí againn ar dheis agus thíos ar €65 an ceann. Gúna Adele Darling,  seaicéad Willa ó Darling agus mála Modal atá sna pictiúir. Tá léine bánbhuí Darling agus tá cairdeagan Darling le feiceáil freisin.

Cultacha Snámha

Gach samhradh má tá an t-ádh linn dul ar laethanta saoire nó fiú amháin dea-aimsir a fháil anseo sa bhaile tá an seans ann go mbraithimid buartha faoi muid féin a nochtadh cois trá inár gculaith snámha.
Níl mórán taithí againn mar Éireannaigh a bheith ag spaisteoireacht timpeall in aice na linne snámha agus cinnte mar sin ní thagann féinmhuinín chomh héasca sin chugainn.

Ní gá a bheith buartha an samhradh seo áfach. Deirtear i gcónaí gurb í an oiriúint nó an chulaith is fearr gur féidir a chaitheamh ná an mhuinín. Gan dabht tá gá le muinín chun culaith snámha a chaitheamh ach táim ag rá libh an tseachtain seo gur féidir le do rogha culaith snámha cabhrú leis an muinín a mhúscailt.

Tá stíleanna difriúla cultacha snámha do gach cineál cruth colainne ann:

  • Má tá cruth ‘buachalla’ ort gan mórán cuar, is féidir cuair a chruthú le ruifilí .
  • Má tá cruth an úill ort smaoineamh maith an tancaíní a chaitheamh. Freisin is féidir aonphíosa a thriail.
  • Má tá cruth an phiorra ort roghnaigh bun le dath amháin agus barr a bhfuil pátrún air 
  • Má tá níos mó agat ar bharr bí cinnte gan barr triantánach a chaitheamh. Bí ag faire amach do bharr le cupáin iontu cosúil le gnáth-chíochbheart.
  • Mura bhfuil mórán agat ar bharr tá barr le muineál irise go maith nó d’fhéadfá ceann a fháil le ruifilí a chuireann leat.
  • Má tá tú buartha faoi bharr do leise, ná caith bun atá teann agus gearrtha go híseal.
  • Má tá tú buartha faoi do chromáin is féidir bun a chaitheamh a bhfuil gearradh níos airde air.


stíl na gcaogaidí i gceist leis an gceann leis na straidhpeanna seo ó Dunnes. Tá neart tacaíochta i gceist leis. €8 atá ar an mbarr agus €5 atá ar an mbun.

Is maith liom an píosa aonarach dubh seo ó Dunnes freisin. Thabharfadh sé seo cruth álainn duit agus níl air ach €12.

Cuireann an rogha seo ildaite ó Dorothy Perkins pátrún de chuid Pucci i gcuimhne dom. €15 atá ar an mbarr agus €15 atá ar an mbun seo.

Tá cruth álainn ar an gceann seo ó Next mar gheall ar an muineál irise. €34 atá air.

Tá an-bhéim ar phátrúin an séasúr seo agus is rogha dheas an ceann seo ó Next arís, €18 atá ar an mbarr agus €18 atá ar an mbun freisin.

Le blianta anois tá réimse snámha deartha ag an aisteoir Kelly Brook do New Look. €21.99 atá ar an mbarr seo agus €11.99 atá ar an mbun.

Bristí cargo

 .

An cuimhin libh an stíl a bhí timpeall sna nóchaidí? An cuimhin libh na brístí móra 'cargo' a chaitheamar leis na sála arda tiubha sin? Ag féachaint siar air anois tagann náire an domhain orainn ach cinnte dearfa bhí a leithéid san fhaisean ag an am! Thógamar ár n-inspioráid ó réaltaí móra na tréimhse sin cosúil leis na cailíní ó All Saints agus Gwen Stefani ó No Doubt. Ba mhinic a bhíodh na mná galánta seo gléasta sna brístí móra tiubha seo agus a mboilg nochta acu. Mar is gnách i gcúrsaí faisin, filleann stíleanna agus treochtaí go minic ach de ghnáth le difríochtaí a oireann don tréimhse atá i gceist.

Ceann de na treochtaí atá fillte i mbealach éagsúil arís ná na brístí 'cargo' seo a chaitheamar na blianta ó shin. Mar is gnách, tháinig branda amháin suas leis an dearadh nua-aoiseach ar na brístí seo agus lean na brandaí agus na siopaí eile iad ansin. Is branda Meiriceánach é J Brand atá cáiliúil as ucht na jíons áille a dhéanann siad. Tá an branda rathúil mar gheall ar an líon réaltaí a chaitheann na jíons seo agus is dócha freisin gurb é sin an fáth a bhfuil an branda chomh costasach!

Go deimhin, is féidir an branda seo a cheannach in Éirinn ach tá sé i bhfad níos saoire i Meiriceá. Le déanaí tá an-éileamh go deo ar dhearadh nua de chuid J Brand, an 'Houlihan Skinny Cargo'! Tagann an t-ainm seo ón gcarachtar Margaret Houlihan sa chlár Mash. Tagann an inspioráid do na brístí seo ón stíl míleata a bhí le feiceáil sa chlár sin. Leis an dearadh nua seo tá na brístí tanaí ach fós tá na pócaí le feiceáil orthu. Cosnaíonn cuid J Brand os cionn €250 ach ná bí buartha mar an tseachtain seo tá cúpla rogha i bhfad níos saoire agamsa daoibh ó shiopaí na mórshráide.

Tá roinnt bealaí éagsúla leis na brístí seo a chaitheamh. Mholfainn úsáid a bhaint as píosaí níos neodraí leo. Mar shampla, barr deas simplí nó barr uachtair a chaitheamh leo agus gan dul thar fóir agus seaicéad míleata a chaitheamh!

Tóg inspioráid ó leithéidí Rihanna, Kate Moss agus Jessica Alba a bhí á gcaitheamh i gceart le déanaí. Is féidir sála arda nó ísle a chaitheamh leo freisin agus cinnte oibríonn siad don lá agus don oíche.

1. Tá an mainicín ag caitheamh na ‘Houlihan’s’ ó J BRAND anseo agus is sampla maith é seo den bhealach ceart le hiad a chaitheamh. Tá barr liath an-simplí á chaitheamh le seaicéad álainn leathair agus sála arda leo, an-ghalánta go deo.

2. Tagann na trí phéire seo a leanas ó WAREHOUSE. €60 atá ar na cinn dhubha seo atá éagsúil ó na cinn chaicí a bhíonn le feiceáil go minic.

3. Tá an dá phéire seo ó WAREHOUSE sa sladmhargadh atá acu faoi láthair. Tá stíl ‘peg’ ar na cosa ar an bpéire seo agus níl orthu anois ach €39.

4. Margadh iontach eile iad an rogha seo arís ó WAREHOUSE ar €26. Tá na cinn seo beagáinín éagsúil leis na poill mar shonraí orthu.

5. Tagann an rogha dheireanach seo ó ASOS.COM. Tá na cinn seo níos gaire don stíl háraim atá le feiceáil go mór an samhradh seo agus cuma shíoda orthu. Is féidir iad a cheannach ón suíomh seo ar €35.

 

Brístí Palazzo

Le roinnt blianta anuas anois is é an stíl bhrístí is mó atá feicthe againn ná brístí tanaí. Idir jíons agus luiteoga, is minic a bhíonn ár gcóras fola srianta leo!
Nuair a tháinig siad amach ar dtús bhíomar ábhairín stadach fúthu mar ní raibh caite againn go dtí sin ach bríste spréite. D’fhéadfá a rá go rabhamar féin-chomhfhiosach agus muid á gcaitheamh fiú mar gheall ar chomh teann is atá siad. Rinne leithéidí Kate Moss an stíl seo cáiliúil agus mealltach agus níl stíl ar bith eile caite againn ó shin, bhuel go dtí anois!

Gan dabht tá neart stíleanna spréite timpeall i láthair na huaire mar gheall ar threocht mhór an tséasúir seo, is é sin stíl na seachtóidí. Tá coimeanna arda ar na jíons seo agus cosa breátha leathana orthu a oireann do gach duine. Ag cur leis an druidim seo ó na brístí tanaí tá stíl eile bríste nach bhfuil feicthe againn ó na hochtóidí, is ea, an séasúr seo táimid ag caitheamh brístí palazzo!

Is cuimhin liom brístí palazzo a chaitheamh nuair a bhí mé sa bhunscoil nuair nach ndéanfadh aon stíl eile an chúis dom, chaithfinn iad le bástcóta san éadach céanna, tá náire orm ag smaoineamh faoi na cultacha seo fiú. Ach i mbliana bhí D&G, Fendi agus Richard Nicoll sásta brístí palazzo a chur san áireamh ina gcuid bailiúchán. Bhí leagan bláthach ag D&G, chruthaigh Fendi éifeacht blocáil dathanna leo agus bhí pléataí le feiceáil ar leagan Richard Nicoll.

Ach an treocht é seo atá níos feiliúnaí don sclábhaí faisin nó an féidir linn ar fad iarracht a bhaint as? Is dóigh gur féidir ach cloí le roinnt rialacha leo. Ó thaobh bróg de, caithigí bróga tiubha cosúil le bróga dinge nó bróga a bhfuil sála arda tiubha orthu chun stíl na seachtóidí a chruthú. Le barréidí, cuir isteach faoi na brístí iad agus caith crios beag tanaí leo, tá sé tábhachtach do choim a thaispeáint mar gheall ar an méid atá ar bun. Oibríonn seaicéid éadroma in éadach cosúil le síoda leo agus is deas an rud é do mhuinchillí a chrapadh suas.

Tagann mo chéad rogha ó na siopaí an tseachtain seo ó Dorothy Perkins mar atá á chaitheamh ag an mainicín anseo. Is culaith léime é le bríste palazzo air, an-deas ar €55.00.

Is rogha an-éagsúil an dara péire seo uathu atá déanta as seacainí, cinnte ba chóir iad seo a choimeád mar phríomhghné na culaithe agus gach rud eile a choimeád an-bhunúsach leo. Is féidir iad a cheannach ar €151.00.

Is ó Dorothy Perkins na cinn dhonna seo le fad níos giorra orthu, is maith liom an crios mar shonra orthu, cosnaíonn na cinn seo €70.

Seo péire níos sofaisticiúla b’fhéidir ó Asos.com, gan dabht tá brístí bána go hálainn i rith an tsamhraidh agus tá an gearradh an-deas ar na cinn seo ar €39.36.

Píosa spraoi amach is amach na cinn bhláthacha seo ó Miss Selfridge ar €59.00, bheidís go deas le barréide dhubh nó bhán agus bróga fíorard.

Seaicéid Samhraidh

Cé go bhfuil an samhradh buailte linn faoi dheireadh agus roinnt laethanta áille feicthe againn, ní féidir dul tríd an samhradh in Éirinn gan seaicéad samhraidh.

Dá mbeadh tú ar saoire thar lear fiú, éiríonn na hoícheanta níos fuaire. Faoi láthair, tá an-rogha de sheaicéid samhraidh atá foirfe dúinne in Éirinn ar fáil sna siopaí. Feictear domsa go bhfuil a lán treochtaí a bhí le feiceáil sa gheimhreadh agus san earrach timpeall go fóill ach le hathruithe beaga ar an ndearadh atá orthu.

Ag an am seo den bhliain, tá an stíl mhíleata fós ann ar bhealach. Tá an-chuid seaicéad éadrom sa stíl mhíleata timpeall faoi láthair.

Creid é nó ná creid, tá seacainí fós linn freisin. Is ea, cheapamar go raibh siad imithe le maisiúcháin na Nollag, ach tá seaicéid le seacainí le fáil i mbealaí difriúla go fóill. Feictear na seaicéid seo i ndathanna níos gile, in oiriúint don samhradh, ach tá cuid acu fós le fáil i ndath dubh.

Tá an lása a chonaiceamar i bhfoirm sciortaí, gúnaí agus barranna le fáil i bhfoirm seaicéid.

Idir stíleanna seaicéid dinnéir, 'boleros' agus cinn le sonraí ar na guaillí, tá neart rogha le fáil don séasúr seo. Seo roinnt samplaí daoibh de na cineálacha difriúla seaicéad seo.

1. Tosóidh mé amach leis na seacainí. Ní chreidim go bhfuil siad fós linn le linn an tsamhraidh! Ó DOROTHY PERKINS an rogha seo ar €80.Glaoitear stíl 'easa' ar an ngearradh atá ar an stíl seaicéid seo mar gheall go bhfuil sé níos giorra ar chúl agus tagann sé síos ag filleadh mar seo chun tosaigh. Is maith liom an dath uachtair atá air mar téann sé leis an dath nocht atá go mór istigh faoi láthair.

2. Tagann an píosa liath agus bándearg seo ó NEXT ar €84. Bhí ceann an-chosúil leis ag TOPSHOP i rith an gheimhridh agus cheap mé go raibh sé go hálainn. Bhuel seo rogha eile ar an stíl seo le coirníní air. Bheadh sé go hálainn le péire jíons agus barr simplí bán.

3. Tagann an rogha eile seo ó MONSOON. Is píosa an-éagsúil é seo agus cuireann sé stíl Cheryl Cole i gcuimhne dom. Tá an píosa seo beagáinín níos costasaí ar €153, ach is píosa é a bheadh agat ar feadh na mblianta.

4. Mar a dúirt mé is féidir aon phíosa éadaigh a fháil faoi láthair déanta as lása agus seo seaicéad lása a chonaic mé istigh in MISS SELFRIDGE ar €61. Tá dathanna soirbéid go mór istigh agus is deas an rogha é seo sa stíl sin.

5. Má tá ócáid agat go luath cosúil le bainis nó na rásaí, céard faoin seaicéad álainn seo a chaitheamh ó DOROTHY PERKINS? Tá sé an-éagsúil mar phíosa. Bheadh sé go hálainn os cionn gúna deas simplí. Tá sé mar chuid den treocht nocht atá timpeall. Cosnaíonn sé €110.

6. Ar deireadh ní fhéadfá dul amú le seaicéad simplí bán an samhradh seo. Is píosa úsáideach é agus an-neodrach mar phíosa. Ceapaim go bhfuil an gearradh atá air an-deas agus €70 atá air ó WALLIS.

Brístí Gearra

An bhfuil sibh réidh le bhur gcosa a nochtadh an samhradh seo? Is dócha go bhfuil na fógraí do Venus agus Veet feicthe agaibh faoin am seo agus sibh anois i mbun ullmhúcháin don dea-aimsir!


Bhfuel is gá a bheith réidh, mar tá brístí gearra fós i mbarr réime an séasúr seo. Is cosúil go mbeimid go léir á gcaitheamh.
Le blianta anois tá bristí gearra feicthe againn ar oícheanta sóisialta chomh minic is atá sciortaí feicthe againn. Sílimse gur stíl an-deas ar fad iad siúd é seo. Is minic freisin a chaitear brístí gearra ‘cathracha’, agus daoine ag obair in ionad sciortaí.


Is rogha comhroghnach an-sofaisticiúil é go deo nuair a oireann an aimsir dó. Cinnte caitear bristí gearra i rith an lae chomh maith go háirithe ar laethanta saoire. Is aoibhinn liomsa an ilúsáideacht seo atá i gceist leo. Mar thoradh ar an éileamh atá ar bhrístí gearra tá an iliomad stíleanna gearrtha, dathanna agus pátrún le fáil i mbrístí gearra faoi láthair.


Molaimse cúpla péire a cheannach an séasúr seo. Molaim daoibh péire deinime a fháil go háirithe. Tá siad neodrach, téann siad le gach cineál barréide agus má éiríonn leat an stíl a oireann duit a aimsiú tá siad an-mhealltach agus úsáideach mar phíosa.


Ba dheas an smaoineamh é freisin péire dubh a cheannach chomh maith, tá siad go hálainn ar oíche shóisialta agus tá siad chomh húsáideach céanna le bríste fada dubh. Mar is eol daoibh an séasúr seo, tá béim faoi leith ar dhathanna geala agus ar phátrúin agus ní haon eisceacht na brístí gearra ach oiread. Seo roinnt de na stíleanna atá feicthe agam le déanaí.

Mar a luaigh mé ní fhéadfá dul amú le péire deinime a cheannach duit féin, tá an-réimse ó thaobh stíleanna agus praghsanna le fáil, tagann na cinn seo mar shampla ó Next ar €26.

Bheadh na cinn seo ó Awear oiriúnach don obair fiú dá gcaithfeá iad le léine agus seaicéad deas, is maith liom an sonra ar an gcrios, praghasréasúnta ar €30.

Cinnte tá an-bhéim ar dhath agus ar phátrún an séasúr seo agus seo péire ildaite a bhfuil pátrún craiceáilte orthu ó Topshop; is gá a bheith i ndea-ghiúmar le hiad a chaitheamh is dócha, €68 atá orthu.

Tá pátrún láidir ar na cinn seo ó Next chomh maith ar €37, tá gearradh éagsúil orthu freisin le coim ard agus pócaí móra, go deas de lá nó d’oíche.

Tá na cinn seo ábhairín gearr ach taitníonn an pátrún seo go mór liom agus is dath an-saibhir é an gorm dorcha seo. Tagann an rogha seo ó Monsoon ar €119.

Tá réimse deas in Penneys faoi láthair agus d’fhéadfá aithris a dhéanamh ar Daisy Duke leis na cinn dhearga agus bhána seo ar €11.

Pastal

Tá fhios agam nach bhfuil deireadh an gheimhridh feicthe againn go fóill agus nach bhfuil mórán feabhais ar an aimsir ach an oiread ach an tseachtain seo, seo chugaibh dathanna!

Táimid go léir bréan d’éadaí dubha, donna agus liatha agus nach bhfuil sé go hálainn a bheith ag smaoineamh ar aimsir ghrianmhar agus laethanta fada geala? Tá éadaí nua an earraigh agus an tsamhraidh ag tosú ag teacht isteach sna siopaí agus is deacair i gcónaí fanacht amach ó na dathanna lonracha!

An séasúr seo, tá téama mór le feiceáil agus is iad dathanna flas candaí, soirbéid nó dathanna uachtar reoite ‘Neopolitan’ atá go mór le feiceáil. Is treocht álainn banúil agus spraíúil é seo.

Tá a lán ruifilí le feiceáil agus tá béim áirithe ar an éadach atá á úsáid freisin cosúil le fialsíoda, síoda agus fabraicí rímhine eile. Na dathanna atá go mór le fáil ná gorm, buí agus bándearg pastail, líológ bog, agus fiú amháin miontais éadrom. Tá samplaí áille de na dathanna seo á n-úsáid ó na dearthóirí móra, go háirithe ó leithéidí Burberry Prorsum, Dior, Versace, Michael Cors agus Alberta Ferretti.

Taitníonn sé go mór liom féin agus táim ag súil leis na dathanna seo a chaitheamh. Seo roinnt samplaí atá amuigh ansin faoi láthair agus réamhamharc ar roinnt píosaí a bheidh ag teacht amach go gairid.

1 Beidh a lán ‘tunics’ timpeall as seo amach agus is aoibhinn liom an ceann álainn seo ó DOROTHY PERKINS i ndath an-éagsúil gorm-glas. Tá sé le fáil ar €55.

2 Beidh gúnaí fada rúitín i ngach áit go gairid agus beidh mé ag féachaint ar roghanna difriúla sna seachtainí amach romhainn ach seo ceann álainn ó MONSOON ar €110.

3 Is treocht an-mhór é ‘nocht’ agus arís beidh mé ag taispeáint samplaí daoibh go gairid ach inniu féach ar na bróga nochta seo ag baint úsáide as na dathanna soirbéid, seo €120 ó DUNE.

Roghnaigh mé na píosaí ar fad seo ó ASOS.COM agus beidh siad ar fad ar fáil go gairid, mar sin coimeádaigí súil amach dóibh.

4 Tá an blús seo go hálainn le caitheamh i rith an lae. Beidh sé le fáil go luath ó ASOS.COM.

5 Is féidir T-léine ar nós an chinn seo a chaitheamh fiú amháin sa bháisteach le seaicéad deas. Le fáil ó ASOS.COM.

6 Ar deireadh, ceapaim go bhfuil an gúna seo ó ASOS.COM an-éagsúil go deo agus dar liomsa, tá cuma an- chostasach air, d’fhéadfadh sé gur dearadh Versace é! Arís beidh an gúna seo le fáil go gairid.

Éadaí Geala

An séasúr seo d’fhéadfá a rá go bhfuil pléascadh mór dathanna geala feicthe againn in éadaí. De ghnáth san earrach agus sa samhradh tuigimid go mbíonn éadaí geala le fáil ach i mbliana tá níos mó fírinne leis seo ná riamh. Roinnt seachtainí ó shin dhírigh mé ar cheann de mhórthreochtaí an tséasúir seo, is é sin blocáil dathanna. Laistigh den treocht sin chonaiceamar go bhfuil an tsaoirse againn dathanna láidre geala a mheascadh le chéile chun éifeacht bhlocála a chruthú. An uair seo táim ag díriú ar an gcaoi le hiad a chaitheamh gan blocáil a dhéanamh leo. I measc na ndearthóirí móra a chuir na dathanna geala seo chun cinn an séasúr seo tá leithéidí Jill Sander, Gucci agus Prada.

Más cuimhin libh ag tús an tséasúir seo rinne mé plé ar straidhpeanna, ar phriontaí agus ar dhathanna geala na ndearthóirí seo agus bhí mé ag súil go mór lena mbeadh ar fáil ansin i siopaí na mórshráide a bheadh ag déanamh aithrise orthu. Is é an toradh go bhfuil na siopaí gnóthach agus geal agus lán de dhathanna mealltacha. Thug mé cuairt ar Zara le déanaí mar shampla agus bhí na dathanna a bhí le feiceáil ann dochreidte idir bhándearg agus ghorm leictreach, oráiste agus ghlas láidir.

Chomh maith leis sin bhí orm dul chuig cóisir na mbáb le déanaí agus iarradh orainn dubh a chaitheamh chuige mar théama, bhí sé an-deacair aon rud dubh a fháil mar nach raibh sna siopaí ach dathanna geala! Cinnte is rud álainn é a bheith ag caitheamh dathanna geala go háirithe agus an aimsir go deas. D’fhéadfá bríste geal a cheannach mar a luaigh mé roinnt seachtainí ó shin nó d’fhéadfá fiú culaith shimplí neodrach a chaitheamh ach crios beag tanaí geal a chaitheamh leis b’fhéidir.

1  Ar dtús chonaic mé an gúna álainn corcra seo ó Monsoon. Dá mbeadh an deis agat é a chaitheamh chuig ócáid speisialta bheadh an t-ádh leat. Infheistíocht ar €203.

2 Mar a dúirt mé mura bhfuil tú sásta léim isteach sa treocht seo ní gá ach crios simplí geal a chaitheamh cosúil leis an gceann oráiste seo ó Next ar €9.50.

3 Arís bealach eile chun blaiseadh den treocht seo a fháil ná trí oiriúintí cosúil leis an mála ‘clutch’ gorm seo ó Wallis ar €45.00.

4 Is aoibhinn liom an gúna bándearg seo atá ar an mainicín, tá sonraí áille ar na guaillí agus níl air ach €45.00 in Awear, margadh!

5 Tagann an bharréide chorcra seo ó Awear freisin, d’fhéadfá é a chur isteach faoi phéire brístí gearra nó é a chaitheamh le jíons ar €25.

6 Tá na bróga dingeacha seo roghnaithe agam ó Office, bíonn an stíl dhingeach níos compordaí agus is aoibhinn liom chomh geal is atá siad. €80 atá orthu.

Treochtaí 2010

Bliain nua buailte linn agus slán ráite againn le 2009. Táimid díreach tar éis ár gcuid airgid a chaitheamh ar na margaí ar fad a bhí le fáil sna sladmhargaí agus cheana féin tá na siopaí lán d'éadaí nua lonracha! I ndáiríre, bogann cúrsaí faisin ar aghaidh níos tapúla ná aon earnáil eile.

Nuair a bhímid ag baint taitnimh as bailiúchán séasúir amháin bíonn na dearthóirí i bhfad chun cinn agus an chéad séasúr eile á chur le chéile acu. Bíonn an brú dochreidte orthu ag iarraidh teacht suas leis na smaointe agus na coincheapa úrnua, séasúr i ndiaidh séasúir agus iad ag taispeáint bailiúchán an earraigh agus an tsamhraidh i lár an fhómhair.

Ach mar thomhaltóirí, faighimid blas de threocht faisin an-tapa agus muid i gcónaí ag súil le héadaí nua agus muid ag iarraidh a bheith gléasta in éadaí atá cothrom chun dáta. Ní mholfainnse riamh do dhaoine dul thar fóir le treocht áirithe, mar shampla le stíl na n-ochtóidí atá feicthe againn le déanaí, gan gléasadh ó bhun go barr sa stíl ach píosaí áirithe den treocht a mheascadh leis na héadaí atá agat cheana.

Ionas nach mbeadh tú i do sclábhaí ceart ag an bhfaisean!


Tá a lán cainte faoi na treochtaí a bheidh le feiceáil againn amach anseo in 2010 faoi láthair agus is mian liomsa an tseachtain seo iad a lua, chomh maith leis na réaltaí nua faisin a cheapaimse go mbeimid ar fad ag aithris orthu a thaispeáint daoibh.

Ag na seachtainí faisin i Londain, in Milan agus i Nua-Eabhrac taispeánadh na bailiúcháin d'earrach agus do shamhradh 2010. Le léargas ginearálta a thabhairt daoibh, seo hiad na treochtaí a sheas amach domsa.

Stíl an ‘laoich todhchaígh: Is éard atá ann ná meascán idir an stíl mhíleata atá feicthe againn agus stíl na treibhe. D’úsáid na dearthóirí Sass and Bide an treocht seo chomh maith le Versace a bhí níos banúla leis agus freisin beidh sé le feiceáil ó Balmain. An treoir leis an treocht seo ná nach bhfuil aon treoir leis! Is féidir a lán píosaí a mheascadh le chéile mar is mian leat.

Cultacha spraoi: Chonaiceamar filleadh ar chultacha spraoi na seachtóidí an bhliain seo caite agus tá siad ag filleadh arís an t-earrach agus an samhradh seo.

 ■ Amasóin don samhradh: Táimid ag súil le dathanna na hAmasóine a fheiceáil! Beidh patrún dufaire le fáil, éadaí geala, spraíúil.

Stíl na n-ochtóidí: Fanfaidh stíl na n-ochtóidí linn ar feadh tréimhse eile. Tá na hochtóidí déanta níos fíneálta ag Mathew Williamson ag úsáid dathanna pastail.

Nocht: Chonaiceamar a lán den dath nocht agus uachtar an bhliain seo caite chomh maith leis an dath luisneach, beidh níos mó le feiceáil sna séasúir atá romhainn agus a lán sreabhann freisin. Le linn na bliana beidh mé féin ag díriú isteach ar na treochtaí ar fad libh agus ag insint daoibh conas iad a chruthú.

Féachaimid i gcónaí chuig na réaltaí móra chun inspioráid a fháil uatha ar chúrsaí faisin. Is minic a sheolann na dearthóirí éadaí nua saor in aisce dóibh agus iad mar mhainicíní beo acu. Tá roinnt réaltaí faisin nua dar liomsa a bheidh ag teacht chun solais i mbliana.

Ina measc tá Kristen Stewart ó Twilight, Nicola Roberts ó Girls Aloud, Annalynne McCord ó Beverly Hills 90210, Whitney Port agus Olivia Palermo ó The City, an t-amhránaí Pixie Lott chomh maith le Leighton Meester agus Blake Lively ó Gossip Girl. Coimeádaigí súil ghéar orthu!

Seaicéid

 

Na laethanta seo agus an aimsir ag dul i bhfeabhas bíonn deacrachtaí againn sa tír seo leis an tslí le gléasadh timpeall bunaithe ar chúrsaí aimsire. Bíonn an deacracht seo ann mar is féidir leis an aimsir athrú ag aon uair agus fiú má bhíonn an ghrian ag taitneamh d’fhéadfadh go mbeadh gaoth nó báisteach ann freisin.

Is minic a fheiceann tú daoine in éadaí samhraidh cosúil le brístí gearra agus t-léinte agus iad fliuch báite nó gorm leis an bhfuacht nuair a imíonn an ghrian gan rabhadh! Cinnte in Éirinn bíonn an tsraith bhreise sin ag teastáil uainn agus an tseachtain seo táim ag díriú isteach ar shraith úsáideach, is é sin an seaicéad.

An t-earrach agus an samhradh seo caite chónaigh mé i mo bhléasar, píosa a cheannaigh mé ó Zara i ndath neodrach liath. Bhí an t-éadach ann bog agus éasca le caitheamh, bhí sé éadrom ach trom go maith chun mé a choimeád te agus mé ag dul amach san oíche. Bhí cnaipe amháin air agus bhí gearradh deas snasta air. Culaith shimplí ach chic a bhí ann nuair a chaith mé péire jíons deasa, barréide shimplí bhán, péire pumpaí agus an bléasar.

An rud is fearr faoin stíl seo seaicéid nó bléasair ná go n-oibríonn sé duit de lá agus d’oíche agus bíonn siad go hálainn fiú nuair a chaitear iad os cionn gúna ag cruthú codarsnacht mhealltach. Cinnte is píosa a d’oibrigh go han-dian a bhí ann agus táim á chaitheamh arís i mbliana cheana féin. Tá neart rogha seaicéad le fáil faoi láthair.

Na stíleanna is mó go bhfeictear domsa ná an bléasar, an stíl ‘waterfall’ nó ‘easa’ nuair a thagann an t-éadach chun cinn síos níos faide ná cúl an tseaicéid, agus an seaicéad leathair ‘gluaisrothaí’. Tá sé cinn i stíleanna éagsúla roghnaithe agam daoibh ó shiopaí na mórshráide.

1 Tá stíl bhádóireachta i gceist leis an gcéad bhléasar anseo ó Penneys. Taitníonn na straidhpeanna go mór liom agus tá sé cosúil le ceann a tháinig amach ó DVF an séasúr seo. Níl air ach €19.

2€19 ar an rogha eile anseo ó Penneys chomh maith. Ní fíorleathar atá i gceist ach is dóigh liom go bhfuil cruth álainn air agus cinnte chaithfeá go minic é.

3 Tagann an ceann gorm seo ó Dorothy Perkins, is sonraí deasa iad na pócaí móra atá air, éadrom agus éasca le caitheamh ar €79.

4 Seo an dara rogha an tseachtain seo ó Dorothy Perkins, níl aon seaicéad níos clasaicí ná ceann dubh nó bán agus is maith liom an ceann bán seo uathu. Arís tá cruth álainn air agus is féidir é a fháil ar €70.

5 Is ó Next an ceann seo i ndath péitseoige, tugann bléasar mar seo cruth álainn duit mar gheall ar na guaillí agus ar an gcnaipe amháin singil atá air. €79 atá air.

6 Ar deireadh táim i ngrá leis an seaicéad seo, €49.95 ó Zara. Cloíonn sé le treocht mhór na ndathanna geala atá againn an séasúr seo agus arís tá gearradh álainn air.

Leathar

Tá na brístí leathair déistineacha feicthe againn ar fad: na cinn gan chruth, atá tiubh agus gearr, agus a thagann ó na luathnóchaidí.

Ó am go chéile, feictear iad go fóill ar mhná bochta na tíre, ag iarraidh a bheith slachtmhar agus iad amuigh san oíche, ach tá a fhios againn go léir nár cheart a leithéid a chaitheamh agus tú ag tiomáint gluaisrothair fiú. Is ea, tá droch-chlú ar leathar thar na blianta ach, a chairde, tá leathar ar ais go mór le déanaí. An dea-scéal ná gur féidir leathar a chaitheamh agus a bheith thar a bheith stíleach anois.

Abair slán leis na seanbhrístí náireacha leathair agus abair hello le héadaí leathair nua na bliana seo! Ní gá duit breathnú cosúil le Angelina Jolie, sa ghúna leathair fada cáiliúil sin, ná ní gá duit a bheith i do ‘goth’ ná ‘biker’ ach an oiread, chun an leathar nua a chaitheamh. Dar ndóigh, tá samplaí áille de leathar in úsáid le feiceáil ó na dearthóirí móra. Tá an seaicéad cáiliúil leis na pillíní gualainne le fáil ó Balmain agus tá ceann leathair le fáil uathu chomh maith.

Tá gúnaí déanta ag Versace faoi láthair agus leathar in úsáid acu freisin. Tá mná clúiteach cosúil le Agyness Deyn, Chloe Sevigny agus fiú amháin Emma Watson (nó Hermione Granger) feicthe againn ag caitheamh leathair i slí éigin le déanaí. An rud is tábhachtaí faoi na héadaí leathair nua seo ná an cruth atá orthu agus an chaoi a bhfuil na píosaí gearrtha, tá siad banúil, gnéasach ach stíleach.

Muidne nach féidir linn infheistíocht a dhéanamh i ngúna de chuid Versace, mar is gnáthneart rogha amuigh ansin ar an mórshráid. Is féidir luiteoga, gúnaí, sciortaí, seaicéid, barréidí, chomh maith le criosanna, bróga, buataisí agus málaí a fháil anois i leathar.

1. Píosa an-mhór an séasúr seo ná an gúna leathair. Is cinnte go bhfuil gúna beag dubh nó LBD ag teastáil ó gach bean ina gcófra agus ní fhéadfá dul amú le ceann leathair a fháil. Tá rogha ollmhór amuigh ansin faoi láthair agus is féidir na mílte a chaitheamh orthu. Chonaic mise an ceann seo ó TK MAXX, margadh iontach ar €19.99.

2. Is infheistíocht an-mhaith dar liom féin airgead a chaitheamh ar sheaicéad leathair, beidh sé agat ar feadh na mblianta, foirfe don lá agus don oíche. Seo dhá shampla mhaithe den rogha atá ann faoi láthair. Tá an chéad cheann anseo ó NEXT, tá leathar álainn bog ann agus tá an gearradh éagsúil air freisin, €193.00.

3. Tá an seaicéad seo ábhairín níos saoire ar €29.00 ó PENNEYS. Stíl an ‘rock chick’ amach is amach.

4. Tar éis mo chuid gearáin ar fad faoi bhríste leathair na nóchaidí, seo chugaibh cinn stíleacha an lae inniu. Beagáinín costasach ar €250 ó FRENCH CONNECTION ach go hálainn fós féin. Ná déan dearmad ar an talcphúdar!

5. Má theastaíonn uait píosa amháin den stíl seo a chaitheamh níl aon rud chomh simplí leis na lámhainní seo, níl orthu ach €11 ó PENNEYS.

 

Éadaí Máithreachais

 

Deirtear go bhfuilimid i lár borradh i líon na mbreitheanna mar thoradh ar an gcúlú eacnamaíochta. Tá líon mór daoine cáiliúla ag súil faoi láthair. Bhí cúpla ag Mariah Carey (41) le déanaí. Tá Kate Hudson (32) ag súil. Ceann de na rudaí is deacra agus tú ag súil ná bheith faiseanta. Bhuel pé scéal é tá mé ag ceapadh go bhfuil sé thar am agam díriú ar éadaí máithreachais! Níor tharla sé go dtí le déanaí agus roinnt de mo chairde ag súil ach tá an t-uafás cainte cloiste agam faoi na fadhbanna a bhíonn ag mná le gléasadh agus iad ag iompar clainne. Is cinnte go bhfuil mná ag iarraidh a bheith galánta agus tarraingteach i gcónaí agus ní stopann an mhian sin mar gheall ar thoircheas.

Blianta ó shin d’fhéadfá a rá nach raibh fáil ar éadaí faiseanta máithreachais, bhí na gúnaí móra cosúil le pubaill gan chruth agus gan stíl. Is cuimhin liom pictiúir de mo mháthair féin a fheiceáil agus í ag iompar sna hochtóidí agus na gúnaí móra uirthi. Gan dabht tá feabhas iontach tagtha ar an rogha éadaí máithreachais atá amuigh ansin faoi láthair agus is minic a bhíonn roinn faoi leith i siopaí na mórshráide fiú.

Bíonn na héadaí seo compordach, saor go maith agus baineann a lán acu le mórthreochtaí an tséasúir féin. Agus mé ag déanamh mo chuid taighde ar na réimsí éadaí máithreachais atá ar fáil sa tír seo chuala mé trácht ar an siopa ‘Haute Mama’. Tá an siopa máithreachais seo lonnaithe i mBaile Átha Cliath ach is féidir siopadóireacht a dhéanamh leo ar líne ag www.hautemama.ie.

Tá réimse álainn d’éadaí faiseanta acu do mhná atá ag súil chomh maith le táirgí do na leanaí iad féin. Freisin tá rogha maith in Next, New Look agus fiú amháin ag Asos.com. Ní gá cófra iomlán nua a cheannach duit féin agus tú ag iompar. An tseachtain seo tá roinnt píosaí bunúsacha roghnaithe agam daoibh chomh maith le cúpla gúna álainn a d’fhéadfaí a chaitheamh ar oíche shóisialta nó ar an ócáid speisialta sin. 

1 Tagann an chéad dá rogha gúnaí seo ó HAUTE MAMA óna mbailiúchán don earrach agus don samhradh seo. Is aoibhinn liom an muineál ard atá air, is féidir é a cheannach ar €149.

2 Mar a luaigh mé le déanaí libh tá bríste giortaithe go mór i bhfaisean i láthair na huaire agus tagann na cinn dheasa seo ó HAUTE MAMA freisin ar €39.36.

3 Bheadh an dara gúna dubh seo uathu go maith d’ócáid speisialta. Is maith liom na ruifilí deasa atá air mar shonra, €159 ó HAUTE MAMA.

4 Tá rogha iontach ar ASOS.COM d’éadaí máithreachais atá nua-aimseartha agus a leanann na treochtaí is déanaí. Ar dtús tá na luiteoga simplí dubha. €52.48 atá orthu.

5 Chomh maith le luiteoga dubha ba chóir péire jíons a cheannach freisin: ASOS.COM ar €32.80.

6 Ar deireadh roghnaigh mé an gúna deas rúitín seo uathu mar tá sé ag baint go díreach leis an treocht gúnaí rúitín agus dath álainn gorm air freisin. Is féidir é a ordú ar €45.92 ar ASOS.COM.

 

Borradh: Surge

Tarraingteach: Attractive

Toircheas: Pregnancy

Luiteoga: Leggings

Muineál: Neck

Seacainí

Nuair a smaoinímid ar sheacainí, tagann íomhánna de sheanmháithreacha ag cluichí biongó nó ag bainis sna hochtóidí chun cuimhne! An bhliain seo caite dá ndéarfadh duine leat go mbeifeá ag caitheamh seacainí in aon áit seachas ar an stáitse cheapfá go raibh siad as a meabhair ar fad. Ach ní do do sheanmháthair nó do pháistí ag ranganna damhsa iad seacainí a thuilleadh. Le tamaillín anuas, tá siad ag teacht ar ais isteach san fhaisean arís go slítheánta agus daoine anois ag cur fáilte rompu! Athmheas ar stíl na n-ochtóidí i gcoitinne is cúis leis seo, is dócha agus muid ar fad in ár snag breac ag breathnú orthu.

Tá na brandaí móra ag baint úsáide as seacainí ina mbailiúcháin don fhómhar agus don gheimhreadh freisin. Tá leithéidí Lily Allen feicthe ag caitheamh seacainí de chuid Chanel agus Sienna Miller á gcaitheamh ó Gucci le déanaí. Ach is úsáid nua-aoiseach agus níos fíneáilte atá i gceist na laethanta seo leo.

Is féidir gach rud ó bhríste go bróga a cheannach faoi láthair agus iad déanta go hiomlán as seacainí. Ní hé sin le rá gur cheart gléasadh ó bhonn go barr iontu cosúil le liathróid dioscó ach is gá a bheith cliste faoi agus gan dul thar fóir leis an treocht seo.

Mholfainnse píosa amháin seacaine a roghnú agus é a chaitheamh mar phríomhghné de chulaith.

Gan dabht ar bith, ní don oíche amháin iad na seacainí; is féidir iad a chaitheamh i rith an lae freisin. Tá neart bealaí inar féidir an stíl seo a chaitheamh i rith an lae mar a fheicfidh sibh thíos. Agus séasúr na Nollag ag druidim linn, beidh na cóisir Nollag ar fad ag tarlú agus go deimhin tá seacainí foirfe do na hoícheanta sin. Chomh maith leis na dearthóirí móra dar ndóigh, tá siopaí na mórshráide lán de sheacainí agus seo chugaibh blaiseadh den rogha is fearr atá amuigh ansin uaimse.

1 Má tá tú ag iarraidh tosú amach le seacainí agus gan a bheith ró-shofheicthe is féidir an hata seo a chaitheamh ó PENNEYS. Níl air ach €4 agus is féidir é a chaitheamh i lár an lae agus fiú amháin agus tú amuigh ar oíche amach. Tá an hata seo gorm ach tá sé le fáil i ndubh freisin.

2 Tá a fhios againn ar fad go bhfuil rian na n-ochtóidí le feiceáil freisin le filleadh na luiteoga arís! Agus ag fanacht le PENNEYS leis na luiteoga seo is féidir an dá threocht a chur le chéile ar €13. Mholfainnse barr an-simplí a shampla le seaicéad tuxedo dubh agus bróga arda dubha. Tá muinín ag teastáil leis an stíl seo ach ar aghaidh leat!

3 Arís ní gá dul thar fóir, is féidir culaith atá agat cheana féin a chaitheamh agus blaiseadh beag den fhaisean seo a úsáid leis an mála álainn seo atá le ceannach ar €42 ó NEXT. 4 Mar a dúirt mé, beidh gúna ag teastáil ó gach duine do na hócáidí ar fad a bheidh ag tarlú um Nollaig. Mar sin, seo chugaibh ceann de na gúnaí seacaine is deise ó NEXT ar €77. Tá gúnaí mar seo le fáil níos saoire ó NEW LOOK agus PENNEYS.

5 Tá na céadta seaicéad seacaine le fáil faoi láthair ach is maith liomsa an ceann seo ó NEXT ar €96.00.

Brístí don Samhradh

Gach séasúr bíonn píosa éadaigh faoi leith a sheasann amach. I gcónaí bíonn an-éileamh go deo ar na píosaí seo agus tarlaíonn sé ansin go n-éirímid bréan de bheith á bhfeiceáil ar gach dara duine! Ó thaobh bríste de an t-earrach agus an samhradh seo caite d’fhéadfá a rá gurb iad na brístí cargó ‘Houlihan’ de chuid J Brand a bhí ag teastáil agus á gcaitheamh ag gach duine.

Cinnte níor chaith gach duine thar €200 orthu, ach bhí na céadta cóip ar fáil i ngach áit. I mbliana is dóigh liom go mbeidh gach duine ag caitheamh bríste ildaite giortaithe. Tá réimse de cheithre dhath an-gheala curtha amach ag J Brand do jíons. Mar a fheiceann sibh anseo tá idir bhuí, ghorm, bhándearg agus dhearg ar fáil uathu. Tá siad go hálainn ar fad ach seans maith nach mbeidh mé ag caitheamh phraghsanna J Brand ar mo phéirese! Beidh tábhacht ag baint le fad na mbrístí seo agus beidh a lán brístí giortaithe an séasúr seo.

Stíl ‘Capri’ atá i gceist leo is dócha agus tá rian leithéidí Audrey Hepburn i gceist leis an treocht seo. Tá roinnt de na brístí giortaithe sa stíl háraim atá timpeall le fada anois freisin ach fan amach ón stíl seo má tá tú buartha faoi do chromáin nó faoi do thóin. Tá réimse dathanna áille le fáil iontu freisin. Beidh a lán brístí dearga agus bándearga mar ghuma bolgóideach á gcaitheamh ag daoine chomh maith le dathanna gorma cosúil le cóbalt agus gorm leictreach. Chuaigh mise amach chun roinnt roghanna a thaispeáint daoibh an tseachtain seo.


1 Is as Dorothy Perkins freisin an ceann oráiste seo. Tá blocáil dathanna i gceist go mór leis an gculaith seo leis an ngorm láidir agus an t-oráiste á meascadh le chéile. €45 atá air seo chomh maith.

2 Táim ag tosú le rogha dheas ghlas ó Dorothy Perkins. Tá cineál stíl háraim ag baint leis an mbríste seo agus is maith liom an tslí go gcasann sé suas ar na cosa. Is dath éagsúil glas é chomh maith, €45 atá air.

3 Rogha eile ó New Look. Mar a luaigh mé níos luaithe beidh bríste dearg an-mhór an séasúr seo ach cinnte ní gá do bholg a nochtadh mar seo! €32.99 atá ar na jíons seo.

4 Ar deireadh bíonn rogha ag Penneys i gcónaí agus cinnte ní bhfaighidh tú blas den treocht seo níos saoire ná an bríste bándearg seo ar €11!

5 Tagann an bríste giortaithe bándearg seo ó New Look, an uair seo tá barréide lása curtha acu leis agus tá rian den bhlocáil dathanna ann arís leis an gcrios beag oráiste. Beidh criosanna tanaí ildaite i ngach áit freisin an séasúr seo. €24.99 atá orthu.

Parse Error: Specification mandate value for attribute data-aria-label-part
04:42PM Oct 21