Tá sé tugtha le fios tráthnóna inniu go bhfuil ceithre chorp eile aimsithe ar an mbád cúrsála, an Costa Concordia. Deirtear go raibh corp de chailín óg, ceithre bliana d'aois, ina measc.
Leis seo, tá 21 corp ar fad aimsithe go dtí seo ag oibrithe tarrthála ar an mbád cúrsála, a chuaigh suas ar na carraigeacha agus a d’iompaigh ar a thaobh, amach ó chósta na Tuscáine an mhí seo caite, ar an 13 Eanáir.
Deirtear go bhfuil 11 duine, ar a laghad, fós ar iarraidh.
Tá an milleán á chur ar chaptaen an bháid, Francesco Schettino, mar gheall ar an méid a tharla agus mar gheall go ndeirtear gur imigh sé den bhád agus paisinéirí fós ar bord. Beidh air dul os comhair na cúirte d’éisteacht ar an 3 Márta.
