Bhí captaen an bháid chúrsála, Costa Concordia, a d’iompaigh ar a thaobh amach ó chósta na Tuscáine ag tús na bliana seo, i láthair ag fiosrúchán inniu, atá á reáchtáil maidir leis an eachtra.
Tharla an eachtra i mí Eanáir na bliana seo, nuair a chuaigh an bád suas ar charraigeacha agus ansin, d’iompaigh sé ar a thaobh in aice leis an oileán Giglio. Maraíodh 32 duine ar fad mar thoradh ar an tubaiste seo.
Dúirt an captaen, Francesco Schettino, nach raibh aon iallach air féin a bheith i láthair inniu ach is cosúil gur theastaigh uaidh a bheith ann.
Tugadh le fios níos túisce inniu go bhfuiltear chun an t-eolas ó bhosca dubh an bháid a chur in iúl le linn an fhiosrúcháin freisin.
Tá an milleán curtha ar an gcaptaen mar gheall ar an méid a tharla agus mar gheall go ndeirtear gur imigh sé den bhád agus paisinéirí fós ar bord. Tá cúiseanna éagsúla curtha ina leith – dúnorgain ina measc.
