Foinse.ie

Saor Leis an Irish Independant gach Ceardoin

Dé Domhnaigh 18 Samhain 2012

RSS

TÁ TÚ ANSEO Spórt Blag Spóirt Oidhreacht Armstrong

Oidhreacht Armstrong

Ríomhphost Priontáil PDF

Bhailigh breis agus ceithre mhíle duine isteach in Palais des Congrès i bPáras Dé Céadaoin seo caite tráth ar fógraíodh Tour de France 2013. Is in 1903 a cuireadh an Tour ar bun i dtosach báire ach de bharr nár ritheadh an rás agus na Cogaí Domhanda ar siúl, seo an céadú heagrán den rás rothaíochta is clúití ar domhan.

Den chéad uair le deich mbliana anuas, is ar bhóithre na Fraince amháin a rithfear an rás an bhliain seo chugainn. Cuirfear tús leis an Tour in Porto-Vecchio sa Chorsaic ar 29 Meitheamh. Trí lá a chaithfidh an peloton ar an oileán. Déanfar an Alpe d’Huez, ceann de na hardsléibhte sa Fhrainc is mó dúshlán ó thaobh na rothaíochta de, a dhreapadh faoi dhó.

Agus i ndiaidh trí seachtaine agus 3,360 ciliméadar sa diallait, cuirfidh na rothaithe críoch le Tour 2013 ar na Champs Elysées - la plus belle avenue du monde - sa chlapsholas lár samhraidh. Ó nár dheas smaoineamh air agus muid dár réiteach féin d’anró an gheimhridh.

‘Is é an dópáil an namhaid,’ a mhaígh Christian Prudhomme, stiúrthóir an Tour de France, ag labhairt dó ag an lainseáil. Dhá lá roimhe sin, cuireadh ar neamhní na seacht mbua a bhí ag Lance Armstrong sa Tour de France idir 1999/2005. ‘Níor cheart an rothaíocht a dhamnú (de bharr cúrsaí dópála),’ arsa Prudhomme, ‘ná an Tour de France ach go háirithe.’

Ní fheadar an fíor nach bhfuil a leithéid ann agus drochphoiblíocht ach seans go raibh timeáil lucht eagrúcháin an Tour ábhairín as alt. Fiú má bhí leithéidí Bradley Wiggins, Cadel Evans, Andy Schleck agus Alberto Contador i láthair ag an searmanas in Palais des Congrès Dé Céadaoin, Armstrong a bhí i mbéal gach duine, é ar nós thaibhse Banquo ag an bhféasta!

‘Is láidre an Tour ná an dópáil,’ a dúirt Prudhomme leo siúd a bhí sásta éisteacht leis. Beidh le feiceáil is dócha. Ach in ainneoin go bhfuil fianaise míle leathanach ann i dtuarascáil USADA go raibh Armstrong agus go leor rothaithe eile ardchaighdeáin á ndópáil féin, is léir go bhfuil amhras go fóill ar roinnt daoine.

Eddy ‘le cannibale’ Merckx, cuir i gcás. Bhuaigh Merckx an Tour cúig huaire idir 1969/74. Thug sé le fios gur chuir eachtra Armstrong díomá air. Ba mhó fós an t-olc a bhí air, áfach, de bharr gurb iad na rothaithe a bhí ar aon fhoireann leis (US Postal), leithéidí Floyd Landis, Tyler Hamilton agus George Hincapie, a sceith ar Armstrong sa chéad áit.

Agus éist lena ndúirt Alberto Contador, buaiteoir an Tour de France sna blianta 2007 agus 2009, agus é ag caint leis na meáin Dé Céadaoin seo caite: Is é Lance Armstrong an duine a spreag ionam an spéis atá agam sa rothaíocht… Ar éigean go bhfuil an ghéarleanúint atá á déanamh air tuillte aige.

Bhí cónaí orm sa Fhrainc ar feadh cúig bliana agus Armstrong i mbarr a réime. Chonaic mé an dua agus an cruatan is gá do na rothaithe a fhulaingt agus iad ar an Tour, lá i ndiaidh lae, bíodh siad i gceantair ardsléibhe i mbrothall an tsamhraidh nó ar bhóithre míntíre faoi dhíle bháistí. Go deimhin, ba é sin cuid den tarraingt, iad a fheiceáil tugtha traochta ag deireadh lae, 180km déanta acu agus fios maith acu go raibh sé le déanamh arís an lá arna mhárach.

An é go raibh mé comhpháirteach ar bhealach éigin sa dópáil? Mé féin agus na milliúin duine eile, ar na bóithre nó os comhair an scáileáin teilifíse? Mé féin agus lucht eagrúcháin an Tour? Mé féin agus na stáisiúin teilifíse? 3,360 ciliméadar a dhéanamh ar rothar taobh istigh de thrí seachtaine, bhí tuairim mhaith agam nach gnáthdhuine a dhéanfadh a leithéid.

An é go bhfuil a rás rite ag an Tour?

 

Suirbhé

An gceapann sibh go mbeidh Uachtarán Mheiriceá, Barack Obama, ábalta don dúshlán atá amach roimhe anois don dara tréimhse sa Teach Bán?




Torthaí

Twitter