Foinse.ie

Saor Leis an Irish Independant gach Ceardoin

Dé Domhnaigh 18 Samhain 2012

RSS

TÁ TÚ ANSEO Spórt Blag Spóirt Na Capaill, Paddy Power agus Cúrsaí Cearrbhachais

Na Capaill, Paddy Power agus Cúrsaí Cearrbhachais

Ríomhphost Priontáil PDF

Ar goracing.ie, tá sraith físeán - ocht gcinn ar fad - ina gcuirtear i láthair an rásaíocht chapall in Éirinn. Is é atá ann go bunúsach ná dianchúrsa do dhaoine ar spéis leo freastal ar rás-chruinniú, bíodh sé i dTigh na Síóg, i bPáirc an Ghabhráin nó i mBaile na Lobhar, ach atá ar bheagán eolais faoin rásaíocht féin.

Sna físeáin, tugtar dúinn spléachadh ar stair na rásaíochta. Mínítear dúinn na cineálacha difriúla rásaíochta atá ann, idir rásaíocht seilge náisiúnta a bhíonn ar siúl go príomha i gcaitheamh an gheimhridh agus rásaíocht ar an réidh ar caitheamh aimsire samhraidh é. Agus déantar (iarracht) an córas ciseanna sa rásaíocht chapall a shoiléiriú.

Saghas leitmotiv atá ann ach deirtear linn arís agus arís eile: an rásaíocht chapall - is cuid dár ndúchas é. Ella McSweeney, craoltóir de chuid RTÉ a bhain clú amach di féin ar chláir theilifíse ar nós Ear to the Ground, a chuireann na físeáin i láthair. Ceann acu ná ‘Conas Buaiteoir a Roghnú’. ‘Muise,’ a deir Ella, ‘dá mbeadh bealach ann le buaiteoir a roghnú…’.

Agus an ceart aici, ar ndóigh. Is fusa i bhfad gramadach na Gaeilge a thuiscint, fiú má tá dhá chaighdeán ann, ná buaiteoir i rás capall a roghnú! Má chuirtear san áireamh fad an ráschúrsa, an meachán is gá don chapall a iompar, an cineál talaimh atá ann, an traenálaí agus/nó an marcach agus cúinsí eile nach iad, feictear nach éasca é mar scéal.

Ach tá clú amuigh ar na hÉireannaigh go dtuigimid céard is capall maith ann. Bíodh sin mar atá ach tuigtear gur fiú breis agus billiún euro an rásaíocht chapall don gheilleagar in Éirinn agus go meallann an tionscal os cionn ochtó míle turasóir chuig an tír gach bliain. I gContae Chill Dara amháin, meastar go bhfuil tuairim is trí mhíle duine ag obair sa tionscal.

Agus is liosta le háireamh iad cuid de na capaill rása is mó cáil ar capaill Éireannacha iad: Arkle, mar shampla, a rugadh ar Ballymacoll Stud i nDún Búinne i gContae na Mí agus a bhuaigh seacht rás is fiche (as cúig cinn is tríocha) sna seascaidí, ina measc an Cheltenham Gold Cup faoi thrí i 1964, 1965 agus arís i 1966.

Nó Dawn Run, capall eile as Éirinn, a bhain clú amach di féin ar ráschúrsaí i Sasana agus sa Fhrainc sna hochtóidí. Nuair a maraíodh í i dtimpiste ar ráschúrsa Auteuil i bPáras i 1986, tuairiscíodh a bás ar chéadleathanach an Irish Times. Agus ní miste capaill ar nós Denman, Beef or Salmon nó Brave Inca, ar capaill iad a raibh cion faoi leith ag muintir na hÉireann orthu de bharr a gcuid éachtaí agus iad ag rásaíocht, a lua anseo freisin.

Nach aisteach é mar sin nach raibh mé riamh ag na rásaí! Fiú más cuid de mo dhúchas é, dá ndéarfaí liom go raibh orm an tráthnóna a chaitheamh i mBaile Phúinse nó ar ráschúrsa ar bith, bheadh níos mó ná drogall orm. Ar chúis amháin is dócha: ní maith liom an ceangal dosheachanta atá idir an rásaíocht chapall agus an cearrbhachas.

Dá bhrí sin, nuair a fógraíodh le deireanas go raibh Paddy Power ag oscailt oifigí nua i gCluain Sceach i mBaile Átha Cliath agus go gcuirfí fostaíocht ar fáil do bhreis agus sé chéad duine de réir mar a thiocfadh fás ar ghnó an chearrbhachais ar líne, níor gheal sé mo chroí.

Mar a dúirt Kim Bielenberg in alt a foilsíodh san Irish Independent i lár na míosa seo caite, is beag seans go mbeifear in ann súil a choimeád ar chliaint an gheallghlacadóra náisúnta agus deis acu anois an pá seachtaine a imirt ach cnaipe a bhrú ar iPhone.

An é an cearrbhachas atá sa dúchas ionainn seachas na capaill?

 

 

 

 

 

 

Suirbhé

An gceapann sibh go mbeidh Uachtarán Mheiriceá, Barack Obama, ábalta don dúshlán atá amach roimhe anois don dara tréimhse sa Teach Bán?




Torthaí

Twitter