Foinse.ie

Saor Leis an Irish Independant gach Ceardoin

Dé Domhnaigh 18 Samhain 2012

RSS

TÁ TÚ ANSEO Spórt Blag Spóirt An Vendée Globe

An Vendée Globe

Ríomhphost Priontáil PDF

Samhlaím agus mé ar tí titim i mo chodladh go mbíonn an teach ar a dhícheall labhairt liom. Na fuaimeanna uile a chloistear ann an tráth sin den oíche atá i gceist agam - dordán an chuisneora sa chistin, an t-uisce ag rith sna píobáin san áiléar, díoscán ó chéim staighre amhail is go raibh duine ar a bhealach aníos chuig an leaba.

Cloistear leis, anois agus mí na Samhna buailte linn, an ghaoth ag osnaíl ar leic na fuinneoige nó an bhaisteach ag clagarnach ar an díon. Nach deas a bheith go teolaí istigh faoin duivé, go háirithe agus an geimhreadh ag fáisceadh isteach orainn, agus éisteacht leis an teach á shocrú féin don oíche.

D’fhanadh Ellen MacArthur ina dúiseacht scaití ag éisteacht lena bád Kingfisher agus í ag taisteal farraigí an domhain le linn Rás an Vendée Globe i 2000/2001 le déanamh cinnte go raibh cúrsaí i gceart. Thuig sí gach a ndúirt an bád léi, an ghaoth sna seolta nó suaitheadh na farraige in aghaidh na cíle.

Is cinnte go raibh deis ag MacArthur aithne mhaith a chur ar Kingfisher i ndiaidh gur chaith siad ceithre lá dhéag agus ceithre scór in éineacht amuigh ar an doimhneacht. Chríochnaíodar sa dara háit sa Vendée Globe i 2001 agus gan ach ceithre huaire fichead idir í féin agus buaiteoir an rása, Michel Desjoyeaux.

Briotánach as Concarneau é Desjoyeaux agus má bhuaigh sé an Vendée Globe i 2000/2001, rug sé an bua leis athuair an uair dheireanach a ritheadh an rás i 2008/2009. Go deimhin, is é Desjoyeaux an t-aon duine ar éirigh leis an rás a bhuachan faoi dhó.

Rás timpeall an domhain don mhairnéalach aonair é an Véndée Globe, gan cead ag na báid stopadh in aon chalafort nó cabhair a lorg le linn an turais. Cuireadh an rás ar siúl den chéad uair i 1989/90 agus arís i 1992/93. Is ina dhiaidh sin a socraíodh go rithfí an Vendée Globe uair in aghaidh gach ceithre bliana.

Fiche bád a bheidh in iomaíocht in eagrán na bliana 2012/2013 agus cuirfear tús leis an rás amárach (10 Samhain) in Les Sables d’Olonne ar chósta thiar na Fraince. Seo an tríú huair do Alex Thomson dul sa seans in ainneoin nár éirigh leis an dá rás roimhe seo, i 2004/2005 agus i 2008/2009, a chríochnú de bharr damáiste a rinneadh dá bhád.

‘Rás an-simplí atá ann,’ a dúirt Thomson go leathmhagúil agus é faoi agallamh ar BBC Sport inné. ‘I ndiaidh Les Sables d’Olonne a fhágáil, castar ar clé; ag Rinn an Dóchais ag bun na hAfraice, castar ar clé arís; ag an bpointe sin, coinnítear an tAntartach i gcónaí ar thaobh na láimhe deise go dtí go dtagtar chuig Rinn an Choirn ag bun Mheiriceá Theas; anseo is gá casadh ar clé uair amháin eile; agus é sin déanta, ar ais go dtí an Fhrainc.’

Naoi bhfear déag agus bean amháin a chrochfaidh seolta sa Vendée Globe amárach agus táthar ag súil leo arís in Les Sables d’Olonne i mí Feabhra. Seans láidir nach n-éireoidh ach le leath acu an rás a chríochnú. Coinneofar súil orthu sa bhlag seo sna míonna romhainn.

Suirbhé

An gceapann sibh go mbeidh Uachtarán Mheiriceá, Barack Obama, ábalta don dúshlán atá amach roimhe anois don dara tréimhse sa Teach Bán?




Torthaí

Twitter