Tuairiscítear go bhfuil an tríú cuid de na daoine, a raibh ticéid acu ón IRFU don chluiche rugbaí idir Éirinn agus an Fhrainc a curtha ar ceal, tar éis cinneadh a dhéanamh gan dul chuig an gcluiche ar an dáta nua.
Deirtear gur cheannaigh breis is 4,000 duine ar fad ticéid trí Chumann Rugbaí na hÉireann (IRFU) don chluiche a bhí le bheith ar siúl ar an 11 Feabhra, idir Éirinn agus an Fhrainc i gCraobh na Sé Náisiún. B’éigean an cluiche a chur ar ceal ag an nóiméad deireanach áfach, díreach sula raibh an cluiche ceaptha tosú, mar gheall go raibh an pháirc reoite.
Dúirt an IRFU go bhféadfadh an dream a cheannaigh na ticéid uathu freastal ar an gcluiche ar an dáta nua atá socraithe, ar an 4 Márta, nó go bhféadfaidís a gcuid airgid a fháil ar ais.
Tuairiscítear go bhfuil thart ar 1,600 duine tar éis a gcuid airgid a iarradh ar ais ar an IRFU. Leis seo, deirtear go bhfuil an-imní anois nach mbeidh an oiread céanna ag tabhairt tacaíochta d’fhoireann rugbaí na hÉireann an babhta seo.
Thug Cumann Rugbaí na Fraince (FRF) le fios nach mbeadh ticéid nua a gcur amach acu féin don chluiche ar an 4 Márta ach is cosúil go bhfuil an IRFU le hiarracht a dhéanamh cuid de na ticéid, ar tugadh aisíocaíocht do dhaoine orthu, a dhíol arís le daoine eile.
